Жасур Абдураимов бошчилигидаги ёшларимиз тўртта жамоа қатнашган мусобақада чемпион бўлгани ҳақида хабар бергандик. Биз Тошкентдаги ўтаётган "Эртанги кун спорти" мусобақаси доирасидаги Ўзбекистон U16 - Туркманистон U16 ўйинини кузатган Жасур Абдураимовнинг Хитойдаги мусобақа таассуротлари билан қизиқдик.

"Хитойдаги халқаро мусобақа аввало Баҳрайндаги U19 Осиё чемпионати тайёргарлик вазифасини ўтаб берди. У ерда биз Хорватия, Хитой ва Филиппин каби жамоаларига қарши ўйнадик.

Биринчи турда Хорватия билан куч синашди. Европа жамоаси анча тезкор, яхши ташкил этилганини кўрдик. Бу ўйинда 1:1 ҳисоби қайд этилди. Кейин мезбон Хитой билан ўйнадик. Шахсан мен учун Хитой Осиё қитъасининг энг кучли жамоаларидан бири ҳисобланади. 3:1 ҳисобида ютган бўлсак ҳам ўйин осон ўтгани йўқ. Сўнгги турни Филиппинга қарши ўтказдик. Айтиш мумкинми бу баҳсда биз рақибдан барча жабҳада устун бўлдик ва 9:0 ҳисобида ғалабага эришдик

Айтганимдек бу Осиё чемпионатига тайёргарлик доирасида фойдали мусобақа бўлди. Ҳимоядан ҳужумга ўтиш ва ҳужумда 3-зонада ўйнаш каби иккита тактикани синовдан ўтказиб олдик. Тўғри йўлдан кетаяпмиз. Қитъа чемпионатига қадар вақт бор, 3-4та жойни кучайтиришимиз керак. Кейинги режаларга келсак март ойида Тошкентда йиғин ўтказамиз. Менимча битта ўртоқлик учрашуви ўтказсак керак", - дейди Жасур Абдураимов.

Эслатиб ўтамиз, Ўзбекистон ёшлар терма жамоаси 13-30 октябрь кунлари Баҳрайнда бўлиб ўтадиган Осиё чемпионатида иштирок этади.

Нарзулла Сайдуллаев

Жасур Абдураимов: "Хитойдаги мусобақа биз учун анча фойдали бўлди"