- "Машъал" жамоаси мавсумни кўнгилдагидек бошлай олмади. Сафарда ва ўз майдонида мағлуб бўлди. Бу борада нима дея оласиз?
- Ҳали мавсум олдинда. Бизда аҳил жамоа бор ва мавсум давомида буни исботлаймиз. Ўзимизни кўрсатишимизга ишонаман. Кейинги ўйинларда мухлисларни хурсанд қилиш учун майдонга тушамиз.

- Бу йил "Машъал" мавсумни Санжар Қувватовсиз бошлади. Санжар жамоани тарк этган ва энди сиз асосий таркиб учун Ботир Носиров билан рақобатдасиз. Бу борада фикрларингиз қандай?
- Мен нафақат Хомяковдан кўп нарсани ўрганмоқдаман балки Санжар Қувватовдан ҳам катта тажрибани олдим. Ҳозир ҳам қайси масала бўлмасин мурожат қилсам қўлидан келганича ёрдам беради. Мураббийим Павел Синелников менга катта футболда кўп нарса бермоқда. Ботир ака тажрибали дарвозабон ва бирга машғулот ўтказишимиз ҳам менга самарали бўлишига ишонаман. Агар мураббийлар менга ишонч билдирса албатта буни оқламоқчиман.

- Жавоҳир ушбу йилда "Машъал" жамоаси номида Олимпия терма жамоасида ҳам иштирок этиб қайтдингиз. Гарчи майдонга тушиш имкони бўлмаган бўлса ҳам бу сиз учун қай даражада муҳим бўлди деб ўйлайсиз?
- Самвел Бабаян жамоасида жуда катта тажриба тўпладим. Майдонга тушиш ёки тушмаслик жуда ҳам муҳим бўлди деб айта олмайман. Мени 23 талик таркибга муносиб кўргани учун аввало мураббийлар штабига, сўнгра "Машъал" жамоасига ҳам миннатдорчилик билдираман. Улар ўсишимга катта туррки бўлди дейишим мумкин. Бабаян турнирдан сўнг агар "Машъал"да ўйинларда майдонга тушсам миллий терма жамоага ҳам чақиришини айтди ва бу мени учун жуда катта рағбат бўлди.

"Машъал" матбуот хизмати

Жавоҳир Илёсов: "Ҳали мавсум олдинда ва ўзимизни кўрсата оламиз"