Форслар 1-турда Африка вакили Марокашга қарши баҳс олиб боришади. Ўйин Санкт Петербургдаги 67 минг томошабинга мўлжалланган стадионда бўлиб ўтади. Ўз тарихида бешинчи бор мундиалда иштирок этаётган Эрон бунгача бирор марта гуруҳдан чиқа олмаган.

Ўйиндан олдин ташкил этилган матбуот анжуманида Эрон термаси устози Карлуш Кейруш қуйидаги фикрларни билдирди:

- "Биринчи ўйин ҳар доим муҳим. Ўйлайманки, иккала жамоа ҳам чиройли ўйин кўрсатиб беради. Ҳам бизда, ҳам Марокашда ажойиб футболчилар бор. Жаҳон чемпионатида иштирок этар экансан, сенда албатта босим ва ҳаяжон бўлади. Бироқ буни тез енгиб ўтиш лозим. Футболда энг яхши тиббиёт бу ғалаба қозониш, шундай экан биз ҳам уч очкони қўлга киритишга уриниб кўрамиз".

- "Марокаш кучли, лекин биз ҳам улардан қолишмаймиз. Эрон ҳаракат қилса бемалол бу жамоани мағлуб эта олади. Биз ўз имкониятларимизни тўлиқ намойиш этишни хоҳлаймиз, шунинг учун ҳам бу ерга келганмиз. Шогирдларим ўйинга тайёр ва ҳамма майдонга тушишни сабрсизлик билан кутмоқда. Менинг режам оддий: аввал ҳимояланиб кейин ҳужумга ўтамиз".

ЖЧ-2018. Карлуш Кейруш: "Эрон Марокашни мағлуб эта олади"