ЖЧ-2026 3-саралаш босқичи
Ўзбекистон - Эрон 0:0
Тошкент, "Бунёдкор" стадиони

Ўзбекистон — 1.Ўткир Юсупов, 2.Абдуқодир Ҳусанов, 4.Фарруҳ Сафиев (3.Ҳожиакбар Алижонов, 46), 5.Рустам Ашурматов, 7.Отабек Шукуров, 9.Одил Ҳамробеков, 10.Жалолиддин Машарипов, 13.Шерзод Насруллаев, 14.Элдор Шомуродов, 22.Аббосбек Фазуллаев (11.Остон Ўрунов, 71), 23.Ҳусниддин Алиқулов.
Захира: 12.Абдувоҳид Неъматов, 16.Ботирали Эргашев, 6.Акмал Мозговой, 8.Жамшид Искандеров, 15.Умар Эшмуродов, 17.Бобир Абдихолиқов, 18.Абдулла Абдуллаев, 19.Азизбек Турғунбоев, 20.Ҳожимат Эркинов, 21.Муҳаммадқодир Ҳамралиев.

Эрон — 1.Алирозо Бейранванд, 2.Солиҳ Хардани, 4.Шожаи Ҳалилзода, 5.Милад Муҳаммади, 6.Саид Иззатуллоҳи, 7.Али Ризо Жаҳонбахш (11.Али Гулизадеҳ, 78), 8.Муҳаммад Мохеби (10.Меҳди Гаеди, 55), 9.Меҳди Тареми, 13.Али Немати, 14.Саман Гходдос (21.Омид Норафкан, 71), 20.Сардор Азмун (19.Шаҳриёр Моганло, 78).
Захира: 3.Муҳаммад Горбани, 12.Паям Ниязманд, 15.Амин Хазбави, 16.Муҳаммад Жавад, 17.Сайид Муҳаммад Карими, 18.Амирҳуссайин Ҳусайинзода, 22.Сайид Ҳуссайин Ҳуссайни, 23.Аря Юсефи

Огоҳлантириш: Фарруҳ Сафиев (19), Одил Ҳамробеков (30), Саман Ғоддос (66).

Четлатиш: Солиҳ Хардани (57)

МАТНЛИ ТРАНСЛЯЦИЯ

ЯНГИЛАШ

Ўйин якунланди.

90+7. Алиқулов томонидан йўлланган зарбага аниқлик етишмади.

90+6. Хавфли вазият! Стандарт вазиятдан узатма натижасида эронлик футболчи бош билан зарба йўллади, Юсупов ўз маҳоратини намойиш этди.

90+5. Ашурматов огоҳлантирилди.

90+3. Ҳакам монитордан вазиятни кўргач, қарорини ўзгартирди! Тинчлантирувчи дорим қаерда эди, топишга ёрдамлашиб юборинглар.

90+1. Ўзбекистон дарвозаси томон пенальти белгиланди. Мезбонлар жарима майдонида тўп Ашурматовнинг қўлига теккан кўринади. Ҳакам ВАР монитори қаршисига келди.

90. Иккинчи бўлимга 8 дақиқа қўшиб берилди.

89. Эрон жарима майдонида тўп меҳмонлар ҳимоячисининг қўлига теккан бўлиши мумкин, бироқ ҳакам ўйинни давом эттиришга қарор қилди.

86. Алижоновнинг ўнг қанотдан узатган тўпи тўғри Бейранванднинг қўлларига бориб тушди.

84. Хавфли вазият! Бурчак зарбасидан сўнг эронлик футболчи бош билан зарба йўллади, мезбон ҳимоячиси жамоаси жонига ора кирди.

83. Алиқуловнинг узоқ масофадан йўллаган зарбаси "Суюнчи" фильмидаги эпизодлардан бирин эслатиб юборди.

78. Эрон икки ўзгариш амалга оширди.

76. Ашурматов жароҳат билан ўйинни давом эттирмоқда. Бу кетишда унинг захирадаги либослари тугаб қолмаса бўлгани эди.

33829 нафар томошабин бугунги ўйинни бевосита "Бунёдкор" стадионидан кузатмоқда.

74. Зарба! Шомуродовнинг чап оёқда йўллаган зарбасини Бейранванд эгаллаб олди.

71. Ўзбекистон таркибида ўзгариш: Файзуллаев ўрнига Ўрунов майдонга туширилди. Шунингдек, Эрон таркибида ҳам ўзгариш рўй берди.

66. Саман Ғоддос ўзидан қочиб кетаётган Шомуродовнинг дастлаб ёқа қисмини, сўнгра бел қисмидан тортидан. Вазиятни тушунган ҳакам эронлик футболчининг янада пастроққа тушишини кутмасдан, уни огоҳлантириб қўяқолди.

65. Азмун рақиб жарима майдонида йиқилди, аммо ҳакам унинг ўрнидан туриш кераклигини таъкидлади.

63. Хавфли вазият! Машариповнинг зарбасига бироз аниқлик етишмади.

62. Зарба! Файзуллаевнинг рақиб жарима майдони яқинидан йўллаган зарбасига Бейранванд қўриқлаётган дарвоза бироз озғинлик қилди.

57. Адолат қарор топди. ВАР вазиятни кўриб чиқди. Эрон ҳимоячиси Солиҳ Хардани Шомуродовга ишлатган хатти-ҳаракатлари билан дзюдо бўйича Олимпиадада иштирок этишга лойиқлигини исботлади ва майдондан четлатилди. Шу маҳорат билан у футболда нима қилиб юрибди, ҳайронман.

55. Эрон таркибида ўзгариш: Мохеби ўрнига Гаеди майдонга туширилди.

54. Шомуродов рақиб жарима майдонига яқин нуқтада йиқитилди, аммо ҳакам стадиондаги томомабинлар сонини санаш билан банд эди.

50. Алижонов ўнг қанотдан олдинга борди ва марказ томон йўналишини ўзгартириб, чап оёқда зарба йўллади, тўп эронлик футболчига тегиб қайтди.

49. Жаҳонбахшнинг узатмаси хавфли кўриниш олди, ўзбекистонлик ҳимоячилар қийинчилик билан тўпни қайтарди.

48. Эронликларнинг ҳужуми хавфли чиқди ва зарба билан якунланди.

46. Иккинчи бўлим бошланди. Ўзбекистон таркибида ўзгариш: Сайфиев ўрнига Алижонов майдонга туширилди.

Биринчи бўлим якунланди.

45. Биринчи бўлимга 4 дақиқа қўшиб берилди.

45. Хавфли вазият! Эрон жарима майдони томон ўзбекистонлик ҳужумчига узатилган тўпни рақиб ҳимоячиси қийинчилик билан майдон ташқарисига чиқариб юборди.

43. Саман Ғоддоснинг жаримадагн узатмаси Юсуповнинг қўлларига бориб тушди.

42. Яна...

42. Ҳакам яна Эрон терма жамоаси фойдасига жарима зарбаси белгилади.

38. Охирги 10 дақиқада ўйин темпи мен ўтирган трибунадаги интернет тезлигига монанд тарзда кечмоқда.

30. Бош ҳакам Ҳамробековни бу сафар кечирмади ва унга чўнтагидаги карточкаси орқали қайси фасл эканлигини эслатиб қўйди.

25. Рақиб футболчиси Ашурматовнинг либоси сифатини текшириб кўрди. Оқибатда ўзбекистонлик ҳимоячи либосини алмаштиришга мажбур бўлди.

22. Стандарт вазиятда икки жамоа футболчилари иштирокидаги тўқнашувдан сўнг ҳакамнинг ҳуштаги кучли чалинди ва икки жамоа шифокорлари тезкорликда ўзаро беллашиб кўрди.

21. Учрашув бош ҳаками Ўзбекистон футболчилари жойлашган майдон тарафга кўпик сепишни ёқтириб қолган кўринади.

19. Сайфиев чап қанотдан қочиб кетишга уринган рақибини тўхтатиб қолгани учун огоҳлантирилди.

15. Ҳамробеков ўз жарима майдони яқинида рақиб футболчисига либос алмашишни таклиф қилганди, аммо ҳакам буни нотўғри тушуниб, чунтагидан кўпикли спрейини чиқарди.

14. Рустам Ашурматов эронликларнинг хавфли ҳужумини бартараф этди.

12. Файзуллаев Шомуродовни рақиб посбони билан бирга-бир вазиятга чиқаришга уриниб кўрди, бироқ Бейранванд чапдастлик қилганча, тўпни биринчи бўлиб етиб келди.

10. Машарипов рақиб жарима майдони йиқитилди, аммо ҳакам кўзойнагини унутиб қолдирган кўринади.

7. Халилзода бурчакдан узатилган тўпга бош билан зарба йўллади, Юсупов ишончли ҳаракат қилиб, тўпни эгаллаб олди.

5. Моҳеби яқинда таниқли қўшиқчиларимиздан бирининг ўз автомобилида барчага кўз-кўз этган тезлигида олдинга бораётганди, бироқ Ҳусановнинг тезлиги ундан ҳам юқорироқ бўлиб чиқди ва ўзбекистонлик ҳимоячи хавфни бартараф этди.

1. Ўйин бошланди. Умид қиламанки, яқинда навбатдаги концерт дастурларини намойиш этишни режалаштираётган қизиқчилар жамоаларининг репертуаридан янги мавзу ўрин олмайди.

Жамоалар майдонга чиқиб келди. Ўзбекистон футболчилари оқ, Эрон ўйинчилари қизил рангли либосларда ҳаракат қилади.

Анча вақтдан буён ручка ушламаганим боис сиёҳ билан ёзишга қийналаман. Айниқса, салом бермаганим учун тушунтириш хати ёзишни истамайман. Шу боис, Ассалому алайкум, қадрли ихлосмандлари деб қоламан. Бугун "Бунёдкор" стадионида Ўзбекистон ва Эрон ўртасидаги қарама-қаршилик гувоҳига айланамиз.

ЖЧ-2026 саралаши. Ўзбекистон бир киши кам бўлиб қолган Эрон билан дуранг ўйнади