Афсуски, бу босқичда Ўзбекистон миллий терма жамоаси иштирок этмайди. Шу боис биз қатнашмайдиган мусобақага қизиқиш катта бўлмаслиги табиий. Бироқ Осиё футболи билан ҳамнафас бўлишимиз учун ҳам ЖЧ саралашни кузатиб боришга тўғри келади.

Гуруҳлар ва формат

Шу ўринда учинчи босқич қандай бўлиши ҳақида яна эслатма тарзида маълумот бериб ўтскк. Иккинчи босқичдан чиққан энг кучли 12та жамоа олтитадан икки гуруҳга бўлинган. Барча жамоалар уй-меҳмон тарзида бир-бирларига қарши иккитадан ўйин ўтказишади.

Гуруҳ босқичи якунларига кўра, ҳар бир гуруҳдан иккитадан - жами 4та жамоа тўғридан тўғри жаҳон чемпионатига йўлланма олади. Учинчи ўринни эгаллаган жамоалар эса ўзаро плей-офф баҳсида иштирок этишади ва ютган жамоа минтақалараро плей-офф босқичига йўл олади.

"A" гуруҳи - Эрон, Жанубий Корея, БАА, Ироқ, Сурия, Ливан.

1-тур. 2 сентябрь

16:00. Жанубий Корея - Ироқ

21:00. Эрон - Сурия

21:45. БАА - Ливан

"B" гуруҳи - Япония, Австралия, Саудия Арабистони, Хитой, Уммон, Вьетнам.

1-тур. 2 сентябрь

15:15. Япония - Уммон

23:00. Австралия - Хитой

23:00. Саудия Арабистони - Вьетнам

Ўйинлар қаерда бўлади?

Демак, юқорида гуруҳлар ва жамоалар билан танишиб олдик. Айтиб ўтганимиздек, ЖЧ саралаш учинчи босқичига эртага старт берилади. Шу ўринда бир савол туғилиши мумкин, ўйинлар қаерда бўлади?

Аввалдан белгилаб қўйилганидек, ОФК имкон қадар терма жамоалар ўртасидаги ҳал қилувчи беллашувларни уй-меҳмон тарзида ўтказишга ҳаракат қиляпти. Орада марказлашган бўлармиш деган гап ҳам чиққанди, бироқ бу шунчаки миш-миш экан. Лекин ҳозирги ҳолатда ҳам тўлиқ барча мезбонлар уйда ўйнайди деб бўлмайди.

Масалан, Австралия Хитой билан Қатарда баҳс олиб боради. Шунингдек, Ироқ ҳам 2-турни Доҳада ўтказади. Дастлабки турда фақат Австралия мезбон бўлиб ҳам нейтрал стадионда ўйнайди. Жанубий Корея Ироқни Сеулда қабул қилса, Эрон "Озоди" стадионида Сурияга қарши баҳс олиб боради. БАА эса уй учрашувини Дубайда ўтказади.

Япония - Уммон учрашуви Япония шимолида жойлашган Суита шаҳрида бўлиб ўтади. Саудия Арабистони эса Ар Риёдда Вьетнамни қабул қилади.

P.S. Учрашувларнинг бошланиш вақти Тошкент вақти билан кўрсатилган.

ЖЧ саралаш. Осиёда катта карвон йўлга чиқяпти