"Брайтон" ярим ҳимоячиси Мойзес Кайседо ушбу трансфер ойнасида клубни тарк этишини тасдиқлади.

"Мен жаноб Блум ва "Брайтон"га АПЛга келиш имкониятини бергани учун миннатдорлик билдираман ва улар учун доим қўлимдан келганини қилганимни ҳис қиляпман. Мен доим табассум билан ва юракдан футбол ўйнайман.
Мен Эквадорнинг Санта-Доминго шаҳрида камбағал бўлиб ўсган 10 нафар боланинг энг кичигиман. Доим Эквадор тарихидаги энг совриндор футболчи бўлишни орзу қилганман. Мен "Брайтон"га рекорд даражадаги трансфер нархини қўлга киритишда ёрдам бера олганимдан фахрланаман, бу уларга уни қайта инвестиция қилиш ва клубнинг муваффақиятини давом эттиришда кўмак беради.
Мухлислар менга қалбларидан жой ажратишди ва улар ҳам ҳамиша қалбимда бўлишади, шунинг учун улар бу ажойиб имкониятдан нега фойдаланмоқчи эканлигимни тушунишади, деб умид қиламан", – деб ёзди Кайседо ижтимоий тармоқда.

Аввалроқ "Арсенал" 21 ёшли футболчи учун 60 миллион фунт таклиф қилгани ҳақида хабар берилганди. Унга "Челси" ҳам даъвогарлик қилмоқда, аммо "чайкалар""кўклар"нинг 55 миллион фунтлик таклифини рад этди.

Эквадорлик футболчи жорий мавсум "Брайтон" сафида 21 та ўйин ўтказиб, 1 та гол урди ва 1 та голли узатмани амалга оширди. Унинг клуб билан шартномаси 2025 йилнинг ёзига қадар мўлжалланган.

Кайседо "Брайтон"дан кетишини тасдиқлади. Футболчини "Арсенал" сотиб олмоқчи