Бу йил илк бор Ўзбекистон киберфутбол профессионал лигаси ҳам ўтказилади. Ушбу мусобақада “Локомотив” футбол клубининг барча тўрт нафар киберфутболчисининг ҳам иштирок этиши қувонарли ҳол, албатта.

Таъкидлаш жоизки, Олий Лига илк мавсумига ноябрь ойининг сўнгги декадасида старт берилади. Унга қадар эса “Локомотив” футбол клуби ташаббуси билан “Lokomotiv Cup” мусобақаси ташкил этилди. Биринчи бор ўтказилган ушбу турнирда жами 32 нафар киберфутболчи “темирйўлчилар” соврини учун кураш олиб борди. Улар қаторида “Қўқон-1912”, “Пахтакор”, “Олмалиқ” ҳамда “Насаф” каби клубларнинг тажрибали киберспортчилари баҳсларда қатнашганини алоҳида қайд этиш жоиз. Қизиқарли тарзда ўтган баҳслар якунига кўра “Sanjar_Loko” никли “Локомотив” киберфутболчиси бош совринни қўлга киритди. У финалда “Doniyor Bek’s”ни 4:2 ҳисобида енгишга муваффақ бўлди. “Sherzod Schurrle_Loko” никли “Локомотив”нинг бошқа бир киберфутболчиси эса учинчи ўринни банд этди.

Якунда ғолиблар “Локомотив” профессионал футбол клуби раҳбарияти томонидан тақдирланди. Тақдирлаш марсомида клуб бош директор ўринбосари Тўлабек Акрамов, футболчилар – Кахи Махарадзе ҳамда Икром Алибоевлар иштирок этиб, ғолибларга совринларни топширишди. Шунингдек, мусобақани ташкил этишда жонбозлик кўрсатган Allianz Arena клуби раҳбари “Abdusapi Legend_Loko”га ҳам эсдалик совғаси ҳамда ташаккурнома тақдим этилди.

Киберфутбол бўйича “Lokomotiv Cup” мусобақаси ўтказилди