Хитойнинг “Шанхай СИПГ” жамоаси шарафини ҳимоя қилиб келаётган ҳамюртимиз ҳамма вақт ўзининг профессионал ва инсонийлик қадрятларининг олий даражасини кўрсатишга ҳаракат қилиб келмоқда. Аҳмедовнинг нафақат юртимизда, балки Хитойда ва бошқа мамлакатларда ҳам мухлислари кўп. Шубҳасиз, Одил бошқалар учун ўрнак сифатида кўрсатса арзийдиган футболчи. У ҳаммасига фақат ўз меҳнати орқали эришиб келмоқда. Қанийди, аксарият футболчиларимиз унга ўхшашса...

Терма жамоамиз сардори ва етакчиси болалар футболига сира ҳам бефарқ эмас. Бир неча бор унинг бу борада ёрдам қўлини чўзгани ҳақида эшитганмиз. Яқинда Хитой чемпионати ўз якунига етди. Шу сабабли Аҳмедов Ўзбекистонга қайтди. Айтиш керакки, футболчи бир неча кун давомида она шаҳри – Наманганда бўлиб турибди. Айтиш жоизки, унинг ҳеч бир вақти зое кетмаяпти. Яъни, Наманганда бўлиб турган пайтида турли маданий тадбирлар, учрашувларнинг асосий қаҳрамонига айланмоқда. Юқорида айтиб ўтганимиздек, Одил Аҳмедов болалар футболига жиддий қарайди ва бу борада ўзининг шахсий “Одил Жуниор” номли футбол мактабига ҳам эга. Табиийки, уйига қайтган чоғида ушбу футбол мактабидаги ишлар қандай кетаётгани билан қизиқди ва яқиндан танишди. Унинг мақсади ёш иқтидорли болаларни муносиб тарбия қилган ҳолда уларга етарли шарт-шароитларни яратиш ва келажакда ўзбек футболи учун хизмат қиладиган иқтидорларни етиштиришдир. Аҳмедов ўз олдига айнан шундай катта мақсадларни қўйган. Шу билан бирга Одил ўзининг болалик чоғини ва катта футболга қай тарзда қадам босганини ҳам ҳали унутгани йўқ. Айниқса, у Намангандаги футбол мактаб-интернатида таҳсил олган. Шу боис бугунги кунда таниқли ўйинчига айланган Аҳмедов ўзи тарбия топиб, футболнинг илк сир-асрорларини ўрганган футбол мактаб-интернатига ҳам бефарқ қараб тургани йўқ. Одил ўқиб, таҳсил олган ушбу футбол мактаб-интернати ҳозирда ҳам ўз фаолиятини давом эттириб келмоқда ва у ерда кўплаб ёш иқтидорлар таҳсил олишмоқда. Ажаб эмаски, ушбу даргоҳда янги Одил Аҳмедовлар етишиб чиқаётган бўлса...

Бизни қувонтирган нарса шу бўлдики, Ўзбекистон фахрига айланган футболчи ўзининг навбатдаги ёрдам қўлини чўзди. Ёш футболчилар учун ҳамма вақт уларга етарли даражада шароит ва имкониятлар яратилган бўлиши керак. Буни эса Одил жуда яхши билади. Чунки унинг ўзи ҳам вақтида ёш бўлиб, ўша футбол мактабида таҳсил олган. Шунинг учун ҳам у ҳамиша болалар футболига жиддий кўз билан қарайди. Ундаги ватанпарварлик руҳияти кучли эканлигига шубҳа қилиш мумкин эмас. Одил ҳозирги ёш ўсиб келаётган авлоднинг келажакда Ўзбекистон ва унинг ривожи учун ҳиссаси тегишини истайди ва бунинг учун болалар футболининг инфратузилмаси, шароитлари юқори даражада бўлишини истайди. Бу Аҳмедовнинг мақсадларидан бири десак асло муболаға қилмаган бўламиз. Шуниси аниқки, футболимиз юлдузи доимо истиқболли режаларни тузиб юради. Айнан Наманганда ташкил этилган “Одил-Жуниор” футбол мактабининг ташкил этилгани ҳам бежиз эмас. Одил ўзи истаган даражадаги футбол мактабини ташкил этиш учун дастлабки қадамларни ташлади ва бу уни хурсанд қиляпти. Негаки, ўзи истаганидек наманганлик, водийлик ёш иқтидорларни излаб топиб уларга яхши шароитлар яратган ҳолда ҳақиқий футболчи қилиб тарбиялаш асосий мақсадлардан бири.

8 декабрь Ўзбекистон Конституцияси қабул қилинган кун! Одил Аҳмедов эса яна бир хайрли ва савобли ишга қўл урди. Аҳамиятлиси, унинг ушбу хайрли иши айнан Конституция байрами куни кенг оммага намойиш этилди. Бунда ҳам ўзига хос рамзий маъно бор, албатта. Ватанни севиб, уни ардоқлаб, ўз юрти учун қўлидан келганича ҳисса қўшиб келаётган унинг фарзандидан ҳар қанча фахрлансак арзийди. Одил Аҳмедов Наманган шаҳридаги футбол мактаб-интернатида таҳсил олди. Албатта, у қандай шароитда ўқиб, изланганини ўзи билади. Муҳими, у сабрли ва меҳнатсевар. Ўзи таҳсил олган футбол мактабига сира ҳам беэътибор бўлмаган унинг собиқ ўқувчиси, ушбу билим даргоҳидан футболнинг сир-асрорларини ўрганиб, эндиликда ўзбек футболининг юзига айланган Аҳмедов ўзи тарбия олган ва билим берган футбол мактабини эъзозлаб, у ерда таҳсил олаётган ёшларга ёрдам қўлини чўзмоқда. Шу мақсадда мазкур мактабга ажойиб кўринишда сунъий қопламали футбол майдонини қуриб берди. Бу истак Одилда анча олдин пайдо бўлганди ва ниҳоят уни рўёбга чиқаришга ҳам эришди. Айнан ушбу чиройли ва қулай шароитларга эга бўлган футбол майдонининг очилиш маросими Конституция кунига тўғри келди ва бу тадбир вилоят раҳбарларининг ҳам эътиборидан четда қолмагани ўзига хос қувонч улашди. Албатта, футбол мактаб-интернати байрамона тарзда безатилганди. Ҳамма хурсанд, шод, кайфият юқори даражада эди. Одил Аҳмедов ўзи тарбия олган футбол мактабига ёрдам қўлини чўзгани барча наманганликларда яна бир бор фахр туйғусини ошириб юборди. Мазкур очилиш маросимига Одил Аҳмедовга унинг акаси, актёр Ёқуб Аҳмедов ва футболчининг маъмури Содиқ Аҳмадалиев ҳамрохлик қилдилар. Шунингдек, Аҳмедовларнинг кичиги Азим ҳам тез орада пайдо бўлди. Шуни айтиш керакки, ҳамма Одилни соғинганди ва шу боис ҳам футбол мактабина йиғилган барча у билан расмга тушиш илинжида бўлдилар. Янги майдоннинг очилиш маросимига Наманган вилоят ҳокими ҳамда шаҳар ҳокимининг ташриф буюриши чиндан ҳам вилоятда футболга бўлган эътибор юқори эканлиги яққол намоён бўлди. Айтиш жоизки, вилоят ҳокими Хайрулла Ҳайитбоевич Бозоров Одил Аҳмедов билан биргаликда махсус лентани қирққан ҳолда расман майдонни очиб беришди. Шундан сўнг вилоят ҳокими сўзга чиқди:

- Айни пайтда юртимизда Конституциямизнинг 25 йиллиги нишонламоқда ва бу орқали халқимизда байрам шукуҳи ҳукм сурмоқда. Бугун эса барчамиз ушбу футбол мактабининг янги майдонини очилиш маросимида қатнашиб турибмиз. Бу билан барчани табриклайман ва ҳаммага муборак бўлсин дейман. Ҳурматли Президентимиз Шавкат Миромонович Мирзиёевнинг бошчилигида юртимизда жуда катта ўзгаришлар амалга ошириляпти. Қисқа фурсат ичида янги қарорлар чиқяпти ва унинг ижросини бажариш асносида мамлакатимиз янада янги қиёфага кириб боряпти. Ҳар бир соҳада бўлгани каби спорт ва хусусан футболда ҳам катта ўзгариш ҳамда ислоҳотлар амалга ошириляпти. Айниқса, ёшлар футболига ҳам катта эътибор берилаётгани ҳам шубҳасиз қувонарлидир. Нима учун терма жамоамиз жаҳон чемпионатларида қатнашмаслиги керак? Нима учун футболимиз янада ривожланмаслиги керак? Ушбу саволни ҳар биримиз албатта ўзимизга беришимиз лозим. Бизда мана шундай футбол мактабининг фаолият кўрсатиши, “Навбаҳор” клуби қошида ҳам футбол мактабининг борлиги албатта Наманган футболининг ривожланиши учун асос бўла олади. Лекин биз шундан самарали фойдалана олишни ҳам билишимиз даркор. Албатта, имкон қадар бундан фойдаланиб келяпмиз. Бунинг самараси ўлароқ ёнимда турган Одил Аҳмедовни айта оламан. Лекин ростини айтаман, бизда унга ўхшаган футболчилар оз.

Бизда ёшлар футболи учун шундай шароит ва имкониятлар яратиляптими, демак, Одил Аҳмедовга ўхшаган ўйинчилар бундан-да кўпроқ бўлиши лозим. Наманган футболининг ўз ўрни бор, аммо янада унинг нуфузини оширишимиз керак. Албатта, Наманган футболи деганда биринчи навбатда “Навбаҳор” тилга олинади. Бу Ўзбекистонда ўз номи ва ўз ўрнига эга бўлган жамоалардан биридир. Лекин биз бу билан чекланиб қолмасдан янада изланишда ва ривожланишда давом этишимиз керак. Бунинг учун албатта болалар футболига бўлган эътиборни ошириш муҳим масалалардан бири ҳисобланади. Ўз футбол мактабларимизда ёшларни тўғри йўлда тарбиялаб, уларни олий лига клублари, миллий терма жамоаларимиз ва Европа клубларида ўйнай олишини таъминлай олсак шундагина қилаётган ишларимизнинг самараси кўринади. Ўйлайманки, бу истакларимизга ҳам оз қолди. Бунинг учун раҳбарият ва мураббийлар доим изланишда, талаб ҳам шунга яраша бўляпти. Табиийки, бугунги ажойиб футбол майдонининг ёшларга фойдаланишга топширилиши ҳам уларнинг келажакда ажойиб футболчи бўлиб етишишларида катта туркти бўлиб хизмат қилади. Бунинг учун ўз номимдан ва Наманган халқи номидан Одил Аҳмедовга миннатдорчилик билдираман. Сизнинг мана шундай хайрли ишга қўл урганингиз аминманки, ёшларимизнинг ривожланишида жуда катта туртки бўлади. Сизнинг бундан кейинги фаолиятингизга каттадан-катта омадлар тилаймиз. Ёшларимиз эса албатта сиздан ўрнак оладилар. Наманган футболи эса бундан-да ривожлансин. Бу йил “Навбаҳор” жамоамиз 5-ўринни эгаллади, келаси йили эса совриндорлар қаторидан жой олишини тилаб қоламан. Ўзбек футболининг жаҳон ареналарида муваффақият қозонишини истайман, - деди Наманган вилояти ҳокими.

Шундан кейин Одил Аҳмедов ҳам сўзга чиқиб, ўз фикрларини билдирди.
- Барчани Конституция байрами билан чин қалбимдан табриклайман. Шу ерда тўпланиб турган барчага миннатдорчилик билдираман. Наманганда иқтидорли болалар жуда ҳам кўп. Уларга эса албатта мана шундай имкониятларни яратиб беришимиз керак. Шу билан бирга “Навбаҳор” клубини ҳам совринли ўринларда бўлишини тилаб қоламан. Энг асосийси, бу ерда Ўзбекистон терма жамоаси учун муносиб бўлган футболчиларнинг етишиб чиқишига ишонаман. Шу ўринда вилоятимиз раҳбариятига ҳам миннатдорчилик билдираман. Улар футбол учун барча шарт-шароитларни яратиб беришяпти. Биз эса бундан унумли фойдаланишимиз лозим. Мен барча ёшларга фақат омад тилайман. Қўлимдан келганича сизларга ёрдам беришга тайёрман. Аминманки, сизлар билан яна кўришамиз. Барчага омад ёр бўлсин, - деди Одил Аҳмедов.

Шу куни жуда кўпчилик ушбу маросимда иштирок этди. Айниқса, у ерда таҳсил олаётган ёш болаларнинг кўзидаги қувонч ва хурсандчилик яққол билиниб турарди. Одил Аҳмедовдан ҳали бу ҳаммаси эмасди. Ажойиб фикрлар билдирилгач, вилоят ҳокими билан биргаликда мактаб тарбияланувчиларига кўплаб спорт кийимлари, тўплар топширилди. Бунга жавобан ушбу даргоҳда тарбия олаётган болалар келажакда Одил Аҳмедовдек футболчи бўлиб етишишга ваъда бердилар. Шундан сўнг янги майдонда иккита жамоа ўртасида дастлабки ўйин ўтказилди. Дарвоқе, янги қуриб битказилган майдонда илк футбол учрашувини Одил Аҳмедовнинг ўзи рамзий маънода очиб берди.

Шуни айтиш керакки, мазкур футбол мактабидан кўплаб футболчилар етишиб чиқишган. Одил Аҳмедовдан ташқари шу куни яна кўплаб бугунги кунда мухлислар эътиборини қозонган футболчилар ҳам қатнашишди. Жумладан, Дилшод Жабборов, Мирзоҳид Ғофуров, Илҳом Бойдадаев, Аъзам Алиев, Отабек Валижонов, Обид Жўрабоев, Азиз Турғунбоев, Владимир Козак ва яна бошқа футболчилар ҳам иштирок этишди ва улар ҳам ушбу футбол мактабининг тарбияланувчилари ҳисобланадилар. Бир сўз билан айтганда, янги майдоннинг очилиш маросими жуда чиройли ва кўнгилдагидек ўтди. Муҳими, ёш ўсиб келаётган авлод учун муносиб совға бўлди. Бунинг учун Одил Аҳмедовдан миннатдормиз.

Шуҳратбек ЖЎРАЕВ

Конституция кунига Одил Аҳмедовдан туҳфа