"Реал Мадрид" дарвозабони Тибо Куртуа "Барселона" президенти Жоан Лапортанинг "қироллик клуби"нинг Испания чемпионатига таъсири ҳақидаги гапига муносабат билдирди. Каталония клуби раҳбари Ла Лиганинг 9-турида "Жирона"га қарши ўйинда (2:1) жамоа бош мураббийи Ханс-Дитер Флик четлаштирилгандан сўнг, бу ҳақидаги саволга жавоб берди.

"Лапорта Негрейра иши туфайли шу каби гапларни айтиши кераклиги учун шундай деди. Мен ҳакамларнинг "Реал"га ёрдам берганини ҳеч қачон сезмаганман. Аксинча, уларнинг қарорлари бизнинг зараримизга ишлаган пайтлар бўлган. Ҳакамлар ҳам одам, улар ҳам хато қилиши мумкин. Уларнинг хатолари бизга фойда келтирганини умуман ҳис қилмаяпман", — дея Куртуанинг сўзларини келтиради Аs.

Эслатиб ўтамиз, икки йил олдин "Барселона" ҳакамлар техник қўмитасининг собиқ вице-президенти Хосе Негрейра билан бирга коррупция масаласида айбланганди.

Куртуа: "Ҳакамлар "Реал"га ёрдам берганини ҳеч қачон кўрмаганман"