Испания чемпионатининг 16-тури сизларни Янги йил оқшомида ҳам ўзининг ўйинлари билан хурсанд қилишга ҳаракат қилади. Шанба ва якшанба кунлари Ла Лига ўйинлари ўтказилишига одатланиб қолган мухлис, энди ўз режимини ҳафтанинг дастлабки кунларига тўғрилагани маъқул. Бугундан бошланадиган 16-тур 2020 йилнинг охирига қадар давом этади. Ундан аввал эса ўтган тур ҳақида эслаб ўтамиз.

Пешқадамлар жангида (ўтган тур олди) Мадриднинг “Атлетико”си “Реал Сосьедад”ни мағлуб қилди ва пешқадамликни ўзида сақлаб қолди. “Реал Мадрид” “Гранада”ни қабул қилди ҳамда 2:0 ҳисобида ишончли ғалабга эришди. “Валенсия” – “Севилья” ўйинида меҳмонлар минимал ҳисобда устунликка эришган бўлишса, “Барселона” муаммолар гирдобидан чиқиб “Вальядолид”ни йирик 0:3 ҳисобида мағлуб этди. Шу ва бошқа ўйинлар билан якунига етган 15-турдан сўнг олдинда бизни 16 тур кутмоқда. Бугун, айнан бошланажак тур ўйинлари анонсини эътиборингиз ҳавола этамиз.

Турнинг дастлабки ўйини: “Севилья” – “Вилярреал”

16-тур шедевр ўйин бошланади, ишонаверинг. 4 ва 6-ўринни эгаллаб турган жамоалар ўртасидаги баҳс муросасиз кечиши шубҳасиз. Йилни яхши кайфият ва яхши ўринларда якунлашни истайди икки жамоа ҳам. Ўтган турда ўз майдонида “Атлетик Бильбао” билан дуранга имзо чеккан эди “Вилярреал”. “Севилья” эса меҳмонда “Валенсия” устидан ғалабага эришди. Ҳозирда икки жамоа ўртасидаги очколар фарқи 3 очкони ташкил этади. Меҳмонлар бир ғалаба билан севиляликларга етиб олиш имкониятлари бор. Шундай экан, учрашувга қизиқиш икки жамоада ҳам юқори. Мазкур баҳс 29 декабрь куни Тошкент вақти билан 21:00 да старт олади.

Ўзаро ўйинлар: Жами ўтказилган 46 ўйиннинг 20 тасида “Севилья”, 12 тасида “Вилярреал” ғалаба қозонган. 14 ўйин эса дуранг билан якунига етган.

Жамоаларнинг жароҳатланган футболчилари: Серхио Эскудеро, Томаш Ватслик (“Севилья”). Пако Алкасер, Алберто Морено, Францис Коклен, Карлос Бакка, Висенте Иборра (“Вилярреал”).

Қаторасига иккинчи марта қуйи поғонадаги жамоага қарши ўйнаётган “Барселона” “Эйбар”га қарши

“Барселона” ўтган турда айни вақтда бу галги рақибидан бир поғона пастдаги “Вальядолид” меҳмони бўлиб, ғалабага эришган эди. Ушбу ўйин ҳам қуйи ўринлардаги жамоа – “Эйбар”га қарши кечади. Каталонияликлар узоқ муддатдан сўнг энди-энди очколар жамғаришни бошлашди. “Эйбар”да эса кўнгилсизликлар ҳали ҳамон. Жамоа 17-поғонада айни вақт. Ўтган турда “Алавес” меҳмони бўлган жамоа 2:1 ҳисобида мағлуб бўлди. Йилнинг сўнгги ўйини қандай кечишини эса майдонда, 29 декабрь 23:15 да кўрамиз.

Ўзаро ўйинлар: Ла Лига доирасида жами 12 учрашувнинг 11 тасида “Барселона” ғалаба қозонган бўлса, 1 тасида дуранг натижа қайд этилган.

Жамоаларнинг жароҳатланган футболчилари: Ансу Фати, Серхи Роберто, Жерар Пике (“Барселона”). Педро Бигас, Паулу Оливейра, Серхи Энрик, Педро Леон, Роберто Корреа, Хосе Анхел, Дамиан Конзёр, Ёсинори Муто (“Эйбар”).

Пешқадам “Атлетико” ўртамеёна “Хетафе”га қарши

Турнир жадвалида энг кам гол ўтказган Мадриднинг “Атлетико”си “Хетафе”ни ўз уйида қабул қилади. Мазкур ўйиндаги ғалаба мадрдиликларни 2020 йилни чемпионатда пешқадам сифатида якунлашини белгилаб берса, “Хетафе”да катта йўқотиш ҳам ёки улкан бир ўсиш ҳам бўлмайди. Айни вақтда 17 очко билан 12-ўринни эгаллаган жамоа мағлубиятга учраса пастга тушишдан кўра ғалаба қозонгач юқорилаш эҳтимоли юқори. Нима бўлган тақдирда ҳам, икки жамоа йилни ғалаба билан якунлашга ҳаракат қилади ва бунга 30 декабрь 23:15 даги ўйинда биргаликда аниқлик киритиб оламиз.

Ўзаро ўйинлар: Умумий ўтказилган 32 баҳснинг 21 таси “Атлетико”, 3 таси эса “Хетафе” фойдасига якунланган. 8 та баҳс дуранг билан якунланган.

Жамоаларнинг жароҳатланган футболчилари: Эктор Эрера, Жоау Фелиш, Иво Грбич (“Атлетико Мадрид”). Абдулай Диаби, Виктор Молехо (“Хетафе”).

Биринчиликка интилаётган “Реал Мадрид” “Эльче”га қарши

“Реал Мадрид”да ҳам, “Атлетико Мадрид”да ҳам бир хил 32 очко мавжуд. Бироқ “Реал Мадрид” “Атлетико”га қараганда 2 та ўйин кўп ўтказган ва шу сабаб жамоа 2-ўринда. Ушбу ўйиндаги ғалаба, балки, мадридликларни пешқадам қилиш мумкин. “Эльче”нинг ҳолатига эса ҳавас қилиб бўлмайди. 16-ўринни эгаллаб турган клуб мағлубиятга учраса хавфли зонага ҳам тушиб кетиш эҳтимоли мавжуд. Ўтган тур ўзидан пастки ўриндаги “Осасуна”га қарши ўйинда 2:2 ҳисобида дуранг ўйнаган жамоа бу сафар “Реал”нинг имтиҳонидан ўтади. Ушбу баҳс 30 декабрдан 31 декабрга ўтар кечаси 01:30 да бошланади.

Ўзаро ўйинлар: Ла Лига доирасидаги 42 баҳснинг 6 тасида “Элче”, 27 тасида “Реал Мадрид” зафар қучган. 9 ўйин эса дуранг билан якунига етган.

Жамоларнинг жароҳатланган футболчилари: Оменук Мфулё, Диего Гонсалес (“Эльче”). Лука Модрич (“Реал Мадрид”).

Испания чемпионатида 2020 йилнинг сўнгги икки ўйинининг бири: “Атлетик Бильбао” – “Реал Сосьедад”

Омадсизликлар гирдобига тушиб қолган “Реал Сосьесад” “Атлетик Бильбао” меҳмони бўлади. Сўнгги 3 ўйинда бор-йўғи 1 очко ишлаган соседадликлар ушбу мавсумни ўртамеёнлар сафида ўтказаётган билбаоликларга қарши ўтказади. Гарчи, мазкур тур 16 чи бўлса ҳам “Реал Сосьедад” учун бу ўйин 17 учрашув бўлади. Бироқ очколар бўйича бироз орқада. Пешқадамликни қўлдан бой бериб юборди. Бу вазиятдан эса “Атлетик Бильбао” унумли фойдаланиши мумкин. Барчаси ўзларининг қўлида. 31 декабр соат 18:00 да бошланажак баҳс барчасига ойдинлик киритиб беради.

Ўзаро ўйинлар: Умумий ўтказилган 151 учрашувнинг 60 тасида “Атлетик Бильбао” жамоасининг қўли баланд келган бўлса, 52 баҳс “Реал Сосьедад”нинг ғалабаси била якунланган. 39 ўйинда жамоалар дурангга имзо чекишган.

Жамоаларнинг жароҳатланган футболчилари: Перу Ноласкоайн (“Атлетик Бильбао”). Асер Илярраменди, Аднан Янузай, Аритс Аранбарри, Лука Сангали, Мигел Анхел Мойя (“Реал Сосьедад”).

Шунингдек, ушбу турда қуйидаги учрашувлар ҳам ўтказилади:

29.12 01:30 (Тошкент вақти) “Леванте” – “Бетис”

29.12 01:30 (Тошкент вақти) “Кадис” – “Вальядолид”

30.12 21:00 (Тошкент вақти) “Гранада” – “Валенсия”

30.12 23:15 (Тошкент вақти) “Сельта” – “Уэска”

31.12 20:15 (Тошкент вақти) “Осасуна” – “Алавес”

2020 йилнинг сўнгги кунида ҳам чемпионат ўйинлари ўтказилади. Жамоалар эса танаффусга чиқишмайди. Байрам ўтиши биланоқ 17-тур учрашувлари бошланади. Ҳозирча унга тўхталмаймиз, аввал ушбу тур ўтиб олсин. Байрамни футбол билан кутиб олинг, ёқимли томоша тилаймиз. Янги йилингиз билан!

Оғабек Самисов тайёрлади

Ла Лига. 2020 йилнинг сўнгги – шиддатли ўтиши кутилаётган 16-тур учрашувлари превьюси