Таассуротлар анча яхши. Шаҳар марказидан бироз четроқ бўлган Ажмандаги бу мўжаз меҳмонхона осудаликни севувчи сайёҳлар учун айни муддао.

Ташрифнинг биринчи куниданоқ машғулотга киришган жамоа аъзолари, бугун кечки йиғинни Форз Кўрфази қирғоқларида олиб боришди. Бундан кўзланган асосий мақсад эртага бўлиб ўтадиган ўртоқлик учрашувига тайёргарлик кўришдир. Хабар қилинганидек, 5 февраль куни “темирйўлчилар” маҳаллий “Ал-Урооба” клуби футболчиларини имтихондан ўтказишади. Беллашув Тошкент вақти билан 18:15 га тайин қилинган.

Андрей Микляев ҳамда Мирко Еличич футболчилар билан икки маҳалдан машғулот ўтказишмоқда. Биринчи йиғиндан фарқли ўлароқ, йигитлар тайёргарликни стадионнинг ўзида давом эттиришяпти. Улар жисмоний тайёргарликни аввалгисидан анчагина яхшилаб олганликлари туфайли, эндиликда тўп билан ишлаш, жамоа ўйин услубини шакллантириш, турли ҳил тактик схемалар устида ишлаш асосий планга чиққан. Шунингдек, кечки овқатдан сўнг йигитлар назарий машғулотлар учун тўпланишади.

Қуйида соҳилбўйи машғулотларидан олинган фотосуратларни тақдим этамиз. Уларда сиз футболчиларнинг бугунги ҳолатини қисман бўлсада ҳис қилишингиз мумкин. Эртага 18:00 дан бошлаб эса твиттердаги расмий саҳифамиз – @LokomotivUzb’да “Ал-Урооба” билан ўйин тафсилотларини ёзиб боришга ҳаракат қиламиз. Бизни кузатиб боринг.

“Локомотив” Дубайда. Кўрфаз бўйида машғулот ФОТО