Ўйин ҳақида

- Ҳаяжонга бой ўйин бўлди. Қийин ўйин ўтказдик. Мақсад ғалаба эди, албатта меҳмонлар ҳам очко қўлга киритиш учун ҳаракат қилишди. Биз тўп билан ишлашда устунликка эга эдик ва бу якунда бизга ғалаба келтирди. Бугунги ғалаба билан жамоамиз аъзоларини табриклайман. Бугун бир ҳафта давомида олиб борган машғулотларимиз самараси кўринди. Ёшлар билан ўйнаш ҳар доим натижа беради.

"Нефтчи" иккинчи даврада яхши ўйин намойиш этмоқда, бу билан уларни табрикласа бўлади. Бизнинг жамоадан бу клубга ўтган футболчилар ҳам бор, уларни ҳам чин дилдан табриклайман. Ҳозирги кунда жамоани навбатдаги мавсумга тайёрлаяпмиз. Кейинги мавсум ҳам янада қизиқарли ўтишига шубҳа йўқ.

- Самарқанднинг "Динамо" клубига қарши ўйиндан сўнг ёшларга имкон беришни айтгандингиз. Ротация бўйича тушунтириш бера оласизми?

- Охирги машғулотлар давомида Алиқулов жароҳат олганди. Шу сабаб бугун биз Иброҳимовни асосий таркибда туширдик. Бундан ташқари кўрган бўлсангиз, охирги дақиқаларда Шаҳзоджон Неъматжоновни ҳам майдонга туширдик. Раҳбарият олдиндаги ҳар бир ўйинда ғалаба учун вазифа қўйган. Шу сабабдан ҳам ҳозирча таваккалга қўл урмаяпмиз. Навбати билан ёш футболчиларни майдонга тушираяпмиз.

- Жамоа бугун ғалаба қозонган бўлса ҳам ўйиндан кўнглингиз тўлдими?

- Албатта, Бектемир Абдуманноновнинг ўйинидан мамнунман. Гол урган футболчи эътиборга тушади, аммо голгача бошқа футболчилар ҳам меҳнат қилишади. Жамоамизнинг барча футболчилари бугун яхши ўйин намойиш этишди ва ғалабага ўз ҳиссасини қўшишди. Бугун ҳимоя чизиғимиз вакиллари кўрсатган ўйиндан ҳам мамнунман.

Луисма Эрнандес: "Ёшлар билан ишлаш ҳар доим натижа беради"