Қуйида бугунги рақибимиз борасида айрим маълумотларни тақдим этамиз.

Малайзия миллий терма жамоаси 1963 йилдан бошлаб ФИФАга аъзо бўлган ва ўша йилда дастлабки учрашувини Таиланд (1:1)га қарши ўтказган. Терма жамоа 1976 йилда Осиё Кубогининг гуруҳ босқичида иштирок этган. Гуруҳда Қувайт ва Хитойга қарши баҳс юритган бугунги рақибимиз сўнгги ўринни олиб, мусобақани эрта якунлаган. Орадан тўрт йил ўтиб, навбатдаги қитъа чемпионатида “Б” гуруҳида тўп тепган Малайзия, 3-ўринни қўлга киритган. Бироқ кейинги босқичга чиқиш вазифасини уддасидан чиқа олмаган. Ўшанда гуруҳда уларга қарши Жанубий Корея (1:1), Қувайт (1:3), БАА (2:0) ва Қатар (1:1) рақиблик қилган.

Дарвоқе, Малайзия терма жамоаси 1974 йилнинг 7 сентябрь куни Эронда ўтказилган Филиппинга қарши кечган баҳсда тарихидаги энг йирик ғалабани қўлга киритган, 11:0.

2015 йилнинг 3 сентябрь куни БААга қарши кечган баҳсда эса ўз тарихидаги энг йирик мағлубиятни қабул қилиб олган, 10:0.

ФИФА рейтингидаги ўрни

Сентябрь ойи якунларига кўра, рақибимиз ФИФА рейтингида 154-ўринни эгаллаган. Терма жамоанинг энг юқори кўрсаткичи 1993 йилнинг август ойишга тўғри келади. ўшанда улар ФИФА рейтингида 75-ўринни қайд этишган. Энг ёмон кўрсаткич 178-ўрин бўлиб, 2018 йилнинг март ойи натижаларига тўғри келган.

2021 йилдаги ўйинлари

Малайзия терма жамоаси 23 май куни норасмий ўртоқлик учрашувида Қувайтга 4:1 ҳисобида имкониятни бой бериб қўйди. 28 май куни эса Баҳрайнга қарши кечган халқаро ўртоқлик баҳсда мағлубиятга учради, - 2:0.

3 июнь куни ЖЧ-2022 саралаш босқичи доирасида БАА (0:4), 11 июнь куни Вьетнам (1:2) ва 15 июнь куни Таиланд (1:0)га қарши баҳсларда майдонгга тушди. Ўзбекистон терма жамоасига қарши ўйин олдидан 6 октябрь куни Иорданияга қарши баҳс юритди. Унда мезбонлар 4:0 ҳисобидаги ғалабани қўлга киритди.

Бош мураббий

Терма жамоа устози Тан Ченг Хое 2017 йилдан буён “йўлбарслар”ни бошқариб келмоқда. У бунга қадар мамлакатнинг ёшлар терма жамоаларида ва “Кедаҳ” клубида ҳам фаолият кўрсатган. Унга Балачандран ва Азмин Азрам Абдул Азизлар ёрдам бериб келмоқда. Словакиялик Мартин Стано эса фитнесс мураббий сифатида эканлигини айтиб ўтиш лозим.

Малайзия терма жамоаси ҳақида нималарни биламиз?