Ҳозирги вақтгача Златан Ибрагимович ва Генрих Мхитарянлар билан шартнома тузилгани расман эълон қилинди. Райан Гиггз кетди. «Ювентус» билан Погба борасидаги музокаралар эса дадил юришлар билан давом этмоқда. «Соккер.ру» портали пайтдан фойдаланиб, Моуриньонинг ниятларини тахмин қилмоқчи. Кўрайлик-чи, «Беназир» «қизил иблислар»дан қандай жамоа тузмоқчи экан?

Жозе ўз принципларидан воз кечадими?

Қайсидир маънода, Гиггзнинг «МЮ»дан кетиши ҳам бу саволга жавоб бўла олади. Зеро, Райан бир муддат «пауза» олган бўлсада, барибир, деярли ўттиз йиллик фаолиятдан сўнг клубни тарк этди. Аслидаку, у аввал-бошданоқ Моуриньонинг номзодига қарши эди. Клуб раҳбарларининг Жозе борасидаги қарори қабул қилингач, у кетишдан бошқа чора топа олмади. Бошқа томондан, Гиггз ўзи бирор-бир клубни мустақил бошқаришни истаётгани ҳам аниқ. Моуриньода эса ёрдамчи мураббийлар етарлича. «Манчестер Юнайтед» ишқибозлари ишонишлари лозимки, Жозе бу ерда «Реал» ва «Челси»да йўл қўйган хатоларини такрорламайди. Чунки у ҳам сезиб турибдики, АПЛ фаворитларига қарши фақат ҳимоядан ўйнаш ярамайди. Демак, у таркибни кўпроқ ижодкор футболчилар билан бойитиши керак.

Златан ёшларни ўқитиш учун келдими?

Ибрагимовичнинг ёшида «Манчестер Юнайтед»га қандайдир рекордларни янгилаш учун келиш ғалати туюлади. Лекин унда бошқа ҳужумчиларда учрайвермайдиган ғолиблик руҳи бор ва бу «МЮ» ёшларига қўл келиши табиий. Биринчидан, у келажакда мураббийлик касбини эгалламоқчи. Иккинчидан эса, Златаннинг ўзи айтганидек, Рэшфорд ва Мартиаль ундан кўп нарсани ўрганишлари мумкин. Бундан ташқари, Златаннинг зиммасига яна бир вазифа юкланиши аниқ - у мураббий ва футболчилар ўртасида «кўприк» бўлиши кутилмоқда.

Погбами ёки «ўзга сайёралик»?

Футбол оламида сўнгги вақтларда пайдо бўлган афсонага кўра, қайсидир клуб улкан натитжаларга эришмоқчи бўлса, таркибида камида бир нафар коинот даражасидаги юлдуз бўлмоғи лозим. Бундай футболчилар эса сайёрамизда кўп эмас, шунинг учун юлдузлар чарчаб қолишса (худди Мессидек), янги совринлар учун Суаресни ҳам таркибга қўшиш талаб этилади. Ёки бўлмаса, «Реал»да бўлганидек, Роналдунинг ёнига Бэйл жойлаштирилади. «Манчестер Юнайтед» эса Погба мисолида келажакда катта финаллар тақдирини ўзгартира оладиган суперфутболчини кўряпти. Унга ваъда қилинган ҳафтасига 250 минг фунтлик маош эса французнинг бошини айлантираётганини тахмин қилиш қийин эмас. Афсуски, Погбага қизиқаётган клуб биргина «МЮ» эмас. «Реал» ҳам ярим ҳимоячига «реал харидор». Шундай экан, манкунианлар қармоқни энди Бэйл томонга йўналтиришгани маъқул. Зеро, Гарет - британиялик ва у Полдан кўра тезроқ муҳитга мослашиб, кўпроқ наф келтириши мумкин.

Руни нега қолади?

Моуриньо агар Уэйнни ярим ҳимояга жойлаштирса, бу - унинг услубига хос юриш бўларди. Лекин «Беназир» илк кунларданоқ ҳаммани чўчитадиган ишга қўл урмаса керак. Шундай қарамай, агар Златаннинг соғлиғи жойида бўлиб, Рэшфорд ва Мартиаль барқарор ўйин кўрсатишса, Уэйн ҳужум чизиғидан «нон топиши» қийин бўлиб қолади. Демак, қайсидир маънода, Руни ҳам Халкнинг ортидан бориб, Хитой чемпионатига қўшилгани яхшироқ эди. Бироқ Руни Моуриньо билан ишлаш имконияти пайдо бўлганидан хурсанд ва ҳеч қаёққа кетмоқчи эмас. Бунинг учун у ҳатто хитойликлар таклиф қилган ўта йирик маошни ҳам рад этди. Шундан келиб чиқсак, Жозе Руни билан Погбани таянч ярим ҳимоясига жойлаштирса, Мхитарян бемалол «замонавий 10-рақам» вазифасини бажараверади.

Мхитарян - омад калитими?

«МЮ» мухлислари айни пайт жамоа ҳимоясидан хавотир олаётган бўлишса керак ва улар тўғри қилишади. Бироқ шов-шувли бўлиши кутилаётган янги харидлардан бири - Генрих Мхитарян ҳам ҳимоячи бўлмаса-да, Моуриньо жамоасига катта ёрдам бериши мумкин. Турган гапки, ғалабани таъминлайдиган аниқ «пас»лари орқали. Энг муҳими, Моуриньо Германиянинг ўтган мавсумдаги энг яхши футболчисини қўлга киритди ва Генрих алоҳида сифатга эга. Яъни, у бир неча йил юқори савияда тўп суриб, кейин маълум муддат ортга кетди-да, яна қайтиб юқори даражага чиқиб олди. Англияга бундеслигадан келган янги футболчилар муаммолар остида қолиши кўп кузатилганини ёдга олсак, Моуриньо танловда адашмаганига амин бўламиз. Тўғри, айни пайт кўпчилик Мхитаряннинг тақдири Кагаваникига ўхшашидан хавотирда. Лекин Мхитарян - Шинжи эмас ва япониялик футболчидан бошқачароқ услубда ҳаракатланади.

Улгуржи савдоларни кўрамизми?

Ҳозирги вақтда «МЮ» таркибида янги футболчилар ва ёшларни ҳисобга олганда, 35 нафардан ортиқ аъзо бор. Табиийки, улар орасида Моуриньо фалсафасига мос тушмайдиганлари ҳам етарлича. Масалан, Жозе аргентиналик Маркус Рохонинг хизматларидан фойдаланмоқчи эмас. Энг катта муаммо шундаки, Рэшфордга ярим соат ичида харидор топиб, пуллаш мумкин. Лекин Моуриньо қарашларига тўғри келмайдиган Мата ёки Феллайниларни тузукроқ пулга сотиш қийин. «Қора рўйхат»да яна Эррера, Блинд, Депай, Янузай каби номлар ҳам бор. Шунча футболчини бекордан-бекорга захирада ушлаб туриш - ақлсизлик бўлади. Демак, кимлардир янги жамоага йўл олиши аниқ.

Яна кимларни харид қилиш керак?

«Тарихдаги энг қимматбаҳо трансфер» йўналишига Погба жуда мос келиши аниқ. Лекин эътиборни фақат юлдузларга қаратавериш ҳам тўғри бўлмайди. Шунинг учун ҳимоя марказига ивуарлик Эрик Бейи танлаб олинди. Энди эса мексикалик камтар йигитча - Ирвинг Лосано трансфери бўйича музокаралар кетмоқда. Чап қанот ҳимоясига ҳам ишончли вакил зарур. Шунингдек, агар Блинд, Жонс ва Бейи Крис Смоллинг билан муносиб жуфтлик ҳосил қилолмасалар, яна бир марказий ҳимоячига эҳтиёж туғилади. Қолаверса, Златан ва Мхитарян билан ҳужумдаги камчиликлар ҳам бартараф бўлиб қолмайди. Бироқ муҳими шуки, Моуриньо аллақачон қайси чизиқлар ўзгаришларга муҳтож эканини аниқлаб бўлди. Шак-шубҳасиз, улар тез орада оптимал ҳолатга келтирилади.

Моуриньо қандай услуб ва таркибни танлайди?

Ниҳоясига етаётган Евро-2016 ўйинларига асосан фикр қилсак, янги мавсумдан бошлаб 4-4-2 чизмасининг замонавий кўриниши яна урфга айланади. Бироқ гап шундаки, таянч ярим ҳимоясидаги Руни ва Погба жуфтлиги кутилган самарани бермай қолиши мумкин. Июль охирларида эса «қизил иблислар» «Боруссия» (Дортмунд) ва «Манчестер Сити» билан куч синашиб олишни режалаштиришган. Демак, бунгача яна бир-иккита трансферни амалга оширш имкони мавжуд.

Масалан, жамоага Матични чақириш мумкин. Агар Конте Кантени «Челси»га олиб келса, бунинг иложи бор, албатта. Энди ўйлаб кўринг: Матич - Погба - Руни учлиги премьер-лигада муваффақиятга эришиши мумкин. Қачонки, ҳужумда Мхитарян - Златан - Мартиаль учлиги-ю, ҳимояда Де Хеа, Шоу ва Смоллинглар барқарор ҳаракат қилишса.

Нима бўлганида ҳам, жамоа ёзда кескин кучаяди ва «МЮ»нинг янги мавсумдаги ўйинлари бир йил аввалгидек, зерикарли кўриниш олмайди. Янги иштиёқ эса ҳамма-ҳаммага етади: Швайнштайгердан тортиб Шнейдерлингача ёки Рэшфорддан тортиб Фосу-Менсагача. Чунончи, ўзгаришлар зарурлиги айтилди - ўзгаришлар бўлмоқда. Кучли ижрочилар сўралди - Мхитарян ва Ибрагимович каби футболчилар билан келишувга эришилди. Фикрларимиз охирида Златаннинг бир гапидан иқтибос келтирмоқчимиз: «Мен Моуриньо учун майдонга чиққанимда, ўзимни «терминатор»дек ҳис қилардим»! Балки Златан бир нимани билиб гапиргандир?..

И.РАҲИМОВ тайёрлади

Манчестернинг «қайноқ» ёзи. «МЮ»нинг янги трансферлари хусусида