Тимур Кападзе шогирдлари Суперлигадаги биринчи ғалабасини қўлга киритди. Муҳташам аренага йиғилган мухлислар эса "қалдирғочлар" устози Шуҳрат Мақсудовдан истеъфо сўраб, унинг ўрнини Виктор Карпенко эгаллашини талаб қилишди.

Албатта, шармандали мағлубият. "Бунёдкор" ўз майдонида тарихда илк бор 5 та тўп ўтказиб юборди. Аммо, масаланинг 2-томони ҳам бор.

Мураббий ўтган мавсум охирида ("Пахтакор" билан ўйиндан кейин) матбуот анжуманида иштирок этиб, жамоа ишқибозларини камситган эди: "Бош ҳомиймиз, хусусан, Меҳриддин Раззоқовичга миннатдорчилик билдирмоқчиман. Юзта мухлисдан биргина мана шундай инсон бўлгани яхши".

Бу гап жамоанинг ҳақиқий ишқибозларини хафа қилгани аниқ. Шу туфайли улар Мақсудовнинг хатоларини ҳазм қила олишмаяпти.

Бироз аввал ўтказилган матбуот анжуманида шундай фикр янгради: "Ишга қўйиш ёки истеъфога чиқариш мухлисларнинг иши эмас".

Бу ўртадаги тоқатсизликни янада кучайтириши мумкин. Агар кейинги ўйинларда ҳам шундай ҳайқириқлар эшитишни хоҳламаса, жамоа раҳбарияти ва мураббий эртагаёқ клуб мухлислари билан учрашув ташкил қилиб, муроса кўчасини топиши керак. Акс ҳолда, жамоатчилик "Бунёдкор"нинг ростан ҳам мухлислар учун эмас, бош ҳомий учун ўйнашига ишониб қолади.

Муаллифнинг бошқа фикрларини кузатиш учун телеграм-каналга аъзо бўлишни унутманг.

Мақсудовдан нега истеъфо сўрашди?