Мазкур учрашувда мезбонларнинг маҳоратли ўйинчиларидан бири Марат Ауезниёзов хет-трик қайд этиб, ғалабага салмоқли ҳисса қўшди. Шу муносабат билан 30 ёшли футболчидан интервью олдик.

- Марат, аввало жамоангизнинг мавсумда омадли стар олгани билан табриклаймиз. Фақат очиғини айтинг, йирик ҳисобда ғалаба қозонишингларни кутмаган бўлсангиз керак?
- Чемпионатнинг илк учрашуви доимо қийин кечади. Айниқса ўз майдонингда ўйнасанг. Чунки ишқибозларни фақат ғалаба қониқтиради. Албатта “Аланга” билан ўйинда ҳам осон бўлмаслигини кутгандик. Аммо тезкор гол якунда йирик ҳисобда ғалаба қозонишимизни таъминлади. Бошланиши ажойиб бўлди. Бундан жуда хурсандмиз.

- “Орол” шу куни энг яхши ўйинини кўрсатдими ёки “Аланга” кучсизроқ кўриндими?
- Косонликлар ҳам яхши ўйнади. “Орол”ни эса энг яхши ўйинини кўрсатди деб бўлмайди. Ўйлайманки энг яхши ўйинларимиз ҳали олдинда. Чемпионат эндигина бошланди ва йигитлар янада ўсишга эришади.

- Учрашувда хет-трик қайд этдингиз. Ҳимоячи сифатида бунга қандай эришдингиз?
- Стандарт вазиятлар бўлганида имкон қадар унда иштирок этишга уринаман. “Аланга” дарвозасига ҳам иккита голни айнан бурчак тўпи амалга оширилганидан кейин урдим. Кейин битта пенальтини ҳам жамоадошларимга илтимос қилиб ўзим тепишимни айтдим. Шу тариқа баҳсда 3та гол уришга муваффақ бўлдим. Очиғини айтганда, учта гол ураман деб ўйламагандим.

- Кейинги ўйинларда ҳам агарда пенальти юз берса, уни бажаришга тайёрмисиз?
- “Орол”нинг “штатний” пенальтичисиман дея олмайман. Лекин келгусида шундай имконият яна туғилса, ундан аниқ фойдаланишга харакат қиламан. Умуман олганда жамоамизда пенальти тепадиган алоҳида бир футболчи йўқ. Бу кўпроқ ўша ўйиндаги холатга ва футболчиларнинг ишончига қараб аниқланади.

- Бу йилги чемпионатдан нималарни кутяпсиз?
- Ҳар бир баҳсда мухлисларимизни қувонтиришни истардим. Тан олиш керак, бугунги холатимиз билан буни уддалаш қийин. Менимча жорий мавсум ҳам қизиқарли ўтади. Ҳар холда шунга умид бор.

- Сизнингча олий лигага чиқиш учун кураш қайси жамоалар ўртасида кечади?
- “Обод” бу борада асосий давогар бўла олади. Унга “Оқ-тепа” рақобатчилик қилиши мумкин. Қолган жамоалар ҳақида эса аниқ бир нима дея олмайман.

- Қорақалпоқ ахли ҳам “Орол”ни олий лигага чиқишни интиқлик билан кутмоқда. Бу кунлар келишига оз қолди дея оласизми?
- Буни мендан кўра мутасадди раҳбарлар аниқроқ билади. Биз футболчилар эса имкониятдан унумли фойаланиб қолишга интиламиз.

- Жамоада раҳбарият томонидан қай даражада эътибор бўлмоқда?
- Бу борада фикрларим тўлқонли ижобий дея олмайман. Аммо яхшиликка умид бор.

- “Орол”нинг таркибига эътибор қаратсак, асосан маҳаллий футболчилардан иборат эканлигини кўрамиз.
- Ҳа, шундай. Бизда асосий эътибор кўпроқ маҳаллий ўйинчиларни ўстиришга ва иқтидорларни юзага чиқаришга қаратилади. Ишонасизми Нукусда иқтидорли футболчилар кўп. Уларга керакли шароитларни яратиб беришса ўйлайманки ёшлар ўзларини кўрсатади.

- Клубда яратилган шароитлар қай даражада?
- Ёмон эмас. Бизда футболчилар ўйидан қатнайди. Машғулот тугагач, ҳамма ўйига кетади. Илгари ўйинлардан олдин футболчиларни алоҳида битта қароргоҳга йиғиб, овқатланиш ва учрашувга тайёргарлик бўларди. Балки келажакда шундан ҳам яхши бўлар.

Исломбек Рустамбеков суҳбатлашди.

Марат Ауезниёзов: “Хет-трик қайд этишимни кутмагандим”