Мусобақанинг 6-гуруҳидан жой олган жамоалар ўртасидаги бир учрашув бугун Навоий вилоятида бўлиб ўтди. Иккинчи босқичнинг сўнгги 7-тур баҳси “Қизилқум”(Навоий)-“Машъал”(Муборак) жамоалари тайёрлов гуруҳлари ўртасида бўлди.

1999-2000 йилларда туғилган ўсмирлардан иборат тайёрлов гуруҳлари ўртасидаги баҳсда икки жамоа жанговор 2:2 ҳисобидаги дурангга рози бўлишди. Микола Лапа шогирдларининг голларига Сиёвуш Ёқубов ва Дониёр Умаров муаллифлик қилди.

2001-2002 йилларда туғилган ўсмирлар ўртасидаги навбатдаги тур учрашувлари эса қизғин ва муросасиз кечди.

Жонибек Эгамбердиев ва Икрем Репатов шогирдлари бўлган ёш "машъал”чилар сафарда ўзларининг ажойиб учрашувларидан бирини ўтказишди. Мубораклик ёш чарм тўп усталари Навоийлик тенгдошларига ҳеч қандай имконият қолдиришмади, улар тенқурларига нисбатан 2:0 ҳисобида устун келишди. Голларни Нормирзаев ва Ғоффоровлар киритди.

Эслатиб ўтамиз, биринчи даврада “Машъал” жамоаси ўз майдонида “Қизилқум”га қарши баҳсда 3:1 ҳисобида ғалаба нашидасини сурган эди.

Мубораклик ёш футболчилар сафардаги муҳим ғалабадан сўнг 16 очко билан турнир пешқадамига айланиб олишди.

Тайёрлов гуруҳлари ўртасида сўнгги тур баҳслари 17 октябрь куни бўлиб ўтади. Шу куни тайёрлов жамоаларимиз Қаршида "Насаф" ўсмирларига қарши майдонга чиқади ва гуруҳлар якунланади.

"Машъал": Тайёрлов гуруҳлари. 7-турда бир ғалаба, бир дуранг