Мазкур мажмуада "Металлург" футзал клуби ўзининг уй учрашувларини ўтказади. Унда, шунингдек, бошқа спорт турлари бўйича ҳам мусобақалар бўлиб ўтади. Мажмуа футзал бўйича Ўзбекистон чемпионати учрашувларининг минимал талабларига жавоб беради. "Металлург" футбол клуби раҳбариятининг айтишича, мавсум аввалида зал қопламаси таъмирланган, унинг деворларида эса бирламчи пардозлаш ишлари олиб борилган.

Бироқ айни вақтга келиб "Ёшлик" спорт мажмуасининг ҳолатида салбий ўзгаришлар бор. Косметик таъмирнинг ўзи билангина муаммо ҳал бўлиб қолмаган. "Металлург" футзалчилари тўп сурадиган объект қолган клубларники билан солиштирганда яхшироқ бўлиши мумкин. Бироқ ПФЛ талабни нисбий кўринишда қўймайди.

2019 йилги мавсумдан бошлаб футзал бўйича Ўзбекистон чемпионати ўйинларига жиддий эътибор қаратилади ва унинг форматида, ўйинлар бўлиб ўтадиган ойларда ўзгаришлар юз беради. ПФЛ, шунингдек, футзал бўйича Ўзбекистон чемпионати трансляцияларини йўлга қўйиш борасида "Спорт" телеканали билан ҳамкорлик қилишни режалаштирган. Масалага шу томондан ёндошилса, "Металлург" футзал клубининг уй учрашувларини намойиш этиш учун "Ёшлик" спорт мажмуасида имкониятлар етарли эмас.

Клуб раҳбарияти ТВ камералари жой олиши учун мачталар ўрнатилиши борасида оғзаки ваъда берди. Бироқ бу етарли эмас. "Металлург" футбол клубидаги мавжуд камчиликлар кўрсатиб ўтилган расмий хат ПФЛ орқали клубга, клуб орқали ҳомий ташкилотга етказилади. Шунингдек, футзал майдонининг пухта таъмирдан чиқарилиши масаласи назорат қилинади. Айни вақтдаги ҳолат эса телевидение талабларига жавоб бермайди.

"Металлург" футзал клубининг натижаларини эса қониқарли баҳолаш мумкин. Клубда футзалга алоҳида эътибор бор, жамоа чемпионатда 4-ўринни эгаллаб турибди. Эндиги навбат эса спорт объектини тартибга келтириш.

Маълумот учун, 2019 йилги мавсум учун талаб жиддий бўлади. Бунда Суперлига клублари футзал, аёллар ва ёшлар жамоалари тўп сурадиган майдонларни талаб даражасига етказиши шарт.

"Металлург" футзал клуби тўп сурадиган объект таъмирдан чиқарилиши керак