Янги мавсум учун илк йиғин клуб қароргоҳида олиб бориляпти. Футболчилар куннинг биринчи ярмида тренажёр залида шуғулланишмоқда. Тушликдан сўнг эса машғулотлар "Металлург" стадионига кўчаяпти ва унда асосий эътибор футболчиларнинг жисмоний тайёргарлигини тиклашга қаратиляпти. Машғулотларни бош мураббий кўрсатмалари асосида "Металлург"нинг маҳаллий мураббийлари олиб боришяпти.

Луисма Эрнандес бошчилигидаги хорижлик мураббийлар эса клуб ихтиёрига янги йилдан кейин келиб қўшилишади. Жамоанинг ўтган йилги ўзаги сақлаб қолинган. Илгари хабар берганимиздек, шартнома муддати тугаган Аббос Отахонов, Жасур Холтўраев, Бобурбек Фарҳодов билан илиқ хайрлашилди. Айни кунларда аксарият ўйинчилар билан шартнома муддатини узайтириш борасидаги ишлар давом эттириляпти. Хусусан, Керим Палич билан яна бир йиллик шартнома имзоланди. Шу ўринда қайд этиш керак, бу йил жамоамизда хорижлик футболчилар сафи кенгайиши кутиляпти. Кўҳна қитъанинг Болқонбўйи мамлакатларидан ва яқин қўшни давлатларнинг тажрибали футболчилари билан музокаралар олиб борилмоқда. Бундан ташқари, селекционерларнинг саъй-ҳаракатлари туфайли кўплаб иқтидорли ёшлар ҳамда тажрибали маҳаллий футболчилар ҳам кўрикка таклиф этилган. Улардан кимлар билан шартнома имзоланиши иккинчи йиғиндан кейин маълум бўлади.

Шу ўринда, иккинчи йиғин январь ойининг биринчи ўн кунлигида яна Бекободда ташкил этилишини қайд этиб ўтамиз. Клуб режасига биноан Бекободда ҳамда Тошкентда бир қатор назорат учрашувлари ўтказилиши режалаштирилган.

"Металлург" машғулотларга киришди