- Микола Николаевич, ўйиндан олган таассуротларингиз, натижадан қониқдингизми?
- Ғалабага эришганимиз жуда яхши. Аммо мени ташвишга солаётгани кўп гол ўтказиб юборганимиз. Агар ҳимояланишни ўрганмасак, натижага эришишимиз қийин кечади. “Локомотив” билан ўйинда бешта, бугун учта гол қўйиб юбордик. Жиддий рақиблар аяб ўтиришмайди.

- Кўп гол ўтказиб юборишда айбдорлар ким?
- Ҳамма. Ҳимоячилар ҳам, дарвозабон ҳам. Афсуски, шу чизиқдагилар бир жойда тўхтаб қолишгандек, назаримда. Ўсишмаяпти. Кимлардир майдонда тинимсиз тер тўкишяпти, кимлардир уларнинг ҳаракатини пучга чиқазаяпти. Ҳар сафар кўрсатма берамиз, йигитларни ҳушёрликка чорлаймиз. Ёш боламас улар, бироқ хатолари ёш болаларникидан ўтиб тушади.

- Шаҳзоднинг ўйини ҳақида нима дея оласиз. Терма жамоадаги биринчи расмий учрашувидан кейинги ўйин эди...
- Нурматовнинг узоқ йўлдан толиқиб келганлигини инобатга олган ҳолда унга биринчи таймда дам бердик. Яхши голлик вазиятларни ўз вақтида сезадиган, имкониятлардан унумли фойдаланадиган шундай ҳужумчига эгамиз. Бугунги ғалабада унинг улуши катта бўлди.

- Шаҳзоддан ташқари терма жамоага номзод бошқа шогирдлар ҳам борми, “Металлург”да?
- Нега бўлмасин. Мана Суннатилла Мамадалиев, тайёр ўйинчи. Меҳнаткаш, вазиятларни тўғри баҳолайдиган, ақлли ўйинчи. Тезкорликда, фикрлашда бугунги термадагилардан асло қолишмайди. Жамоамиздаги яна икки уч нафар футболчига бемалол эътибор қаратишса, бу йигитлар мураббийларни уялтиришмайди. Битта гапни айтайми, Нурматов ва Норбековлар жисмоний тайёргарлик бўйича ўз тенгқурлари орасида етакчи эканлигини мураббийлар кенгашида таъкидлашганларида мен ажабланмадим. Чунки бу йўлда клубда ишлар тўғри йўлга қўйилган.

- Иккинчи даврадаги ўзгаришлар ўзини оқлаяптими?
- Буни вақт кўрсатади. Биз қайси жамоалардан футболчиларни таклиф қилганимизни унутманг. Тошматовни “Сўғдиёна”дан чақиргандик. Иккинчи даврада Абдуллаев, Муродов сингари ўйинчилар “Нефтчи”дан сафимизга келиб қўшилишди. Уларда жисмоний тайёргарлик у ёқда турсин, ўйин амалиёти бўлмаган. Тошматов бугунги кунда уч тайм ўйнасак ҳам югуришга кучи етади. Фақат бошини, ақлини кўпроқ ишлатишини хоҳлардим. Муродов, Абдуллаевларга вақт керак. Ҳозирча уларнинг имкониятлари битта таймга етади холос.

Микола Шевченко: Ҳимояланишни ўрганмасак, натижага эришиш оғир бўлаверади