"Йигитлардан миннатдорман. Бу мавсумда чиройли ўйинлар кўрсатишмоқда. Стадионга келган мухлислар ачинишмади деб ўйлайман. Биринчи таймда яхши ҳаракат қилдик. Гол ўтказганимиздан кейин йигитлар шошишмади ва бу ўз самарасини берди. Иккинчи таймда икки жамоа ғалаба учун курашди. Ҳақли равишда ғалаба қозондик деб ўйлайман. Кеча Равшан Эрматов Жаҳон чемпионатида ишлаши ҳақида хабар чиқди. Ушбу ҳакамимизга жамоа номидан келгуси фаолиятида омад тилаб қоламиз.

"Бухоро" таркибида тажрибали футболчилар бор, биздаги йигитлар ҳам бироз малакаси камроқ бўлиши мумкин, аммо ёш эмас. Аввал ҳам айтганман, биздаги футболчилар қизлар билан гаплашади, шундай экан уларни ёш деб бўлмайди.

Терма жамоа билан узоқ сафарга бориб келдим. Сенегал ва Марокаш билан ўртоқлик учрашувлари ўтказдик. Мана шундай ўйинлар кўпроқ бўлиши керак. Таркибдаги барча ўйинчиларга имконият берилди. Шундай давом эттирилса Осиё Кубогига яхши ҳолатда етиб борамиз", - дейди Миржалол Қосимов.

"Ғалаба қозондик, кайфият зўр. Мураббий танлаган тактикада ўйнаяпмиз, натижа бўлмоқда. Ҳар бир ўйиндан олдин гол ураман деб майдонга тушаяпман, шукурки бунга эришаяпман", - дейди Хуршид Ғиёсов.

Миржалол Қосимов: "Равшан Эрматовга омад тилаймиз"