"Мухлисларимизга миннатдорчилик билдираман. "Андижон" мухлисларига ҳам раҳмат. Ажойиб муҳит остида ўтган асабий ўйин бўлди. Шогирдларимга ҳам раҳмат айтаман. Бугун мағлуб бўлган тақдирда ҳам футболчиларни урушиш ниятим йўқ эди. Футболда бундай учрашувлар бўлиб туради. Биринчи бўлимда ёмон ўйнамадик. Тўп назорати ҳам бизда эди ва Ғиёсов гол урди. Футболда мана шундай қизиқарли воқеийликлар учраб туради. Бутун жамоа Дилшод Ёқубовни қўллаб-қувватлашди ва янада кўпроқ ҳаракат қилишди. Биринчи голда бироз ҳаяжон кузатилгандек. Иккинчи голни эса барча кўрди. Учинчи гол ҳам тушунарли. Яқин бурчак гол ўтказиб юборилса, бу дарвозабоннинг хатоси дея футбол ўргатишган мен ёш вақтларимда. Шунга қарамай, жамоа ўзида куч топа олди. Йигитлар борини бериб ўйнашди. "Андижон"га кейинги учрашувларда омад тилайман", - деди Миржалол Қосимов бугунги баҳс якунлангач.

- Учрашувдаги асосий ҳодисалари иккинчи бўлимда рўй берди. ОКМК 1:3 ҳисобида мағлуб бўлаётган чоғи, жамоангиз камбэк амалга ошира олишини қанчалик кутган эдингиз?

- Футболда ҳар нарса бўлиши мумкин. Шу сабабли футбол бутун дунёдаги энг машҳур спорт тури. Менга шижоат ва охиригача курашиш муҳим, аммо қалбимнинг тубида гол уриш ва дуранг қайд этишга интилиш нияти бор эди. Яратганга шукр, бизни ҳаракатимизга яраша мукофотлади.

Миржалол Қосимов: "Яратганга шукр, бизни ҳаракатимизга яраша мукофотлади"