- Қизиқарли учрашув гувоҳи бўлдик. Қийин об-ҳаво шароитида шогирдларим рақибга муносиб қаршилик кўрсатишди. Афсуски қайд этилган ҳисоб ўйинга мос бўлмади. Ўзимиз яратган имкониятлардан унумли фойдаланганимизда, ҳозир тамомила бошқа ҳисоб ҳақида фикр билдираётган бўлардик. “Сен урмасанг, сенга уришади!” ибораси бугун яна бир карра амалда исботланди. Бироқ қайд этилган ҳисоб қўрқинчли эмас. Жавоб ўйинига керакли хулосалар қабул қилган ҳолда тайёрланамиз. Уйда вазиятда ўнглаймиз, - дейди Миржалол Қўшоқович.

- “Бунёдкор” аввалги учрашувларда қизиқарли ва ишончли ўйин кўрсатаётганди. Жамоангиз Таиландда яхши ўйнай олмаганлигининг сабаби нимада?
- Об-ҳаво муаммолар туғдирди. Босиб ўтилган олис йўлдан кейин ҳамма футболчи ҳам қайта тиклана олмади. Бурирамга етиб келгунча йўлда бир суткадан кўпроқ вақт ўтказдик.

- “Бунёдкор” жорий йилги мусобақадаги биринчи мағлубиятини айнан “Бурирам Юнайтед”дан қабул қилиб олди. Буни қандай изоҳлайсиз?
- Футбол – хатоларни кечирмайди! Вазиятларда аниқ ўйнай олмай, назоратни қўлдан чиқардик. Бундан эса рақиб унумли фойдаланди. “Бурирам Юнайтед”нинг стандарт вазиятлари ўта хавфли эканлиги ҳақида футболчиларимизга етарлича кўрсатмалар бергандик. Афсуски, таиландликлар жарима зарбаларидан фойдаланиб қолишди.

Миржалол Қосимов: "Жавоб ўйинида вазиятни ўнглаймиз"