Бугун "Тоттенхэм" ўз майдонида "Манчестер Юнайтед"ни қабул қилади. Иккала клуб ҳам кучли тўртликка кириш ва келаси мавсум Чемпионлар лигасида ўйнашга умид қилмоқда. Демак, бизни ажойиб тўқнашув кутяпти.

Жамоалар бу баҳсга қандай ҳолатда келмоқда ва португалиялик ҳамда норвегиялик мутахассис ўртасидаги дуэлдан нимани кутиш керак?

Турнир жадвалидаги ҳолат

"Тоттенхэм" ва "Манчестер Юнайтед" якуни йўқ интригалар билан барчани ўзига жалб этадиган клублардир. Иккала жамоа ҳам тўртинчи ўрин учун кураш олиб бормоқда.

Айни дамда ЧЛ ҳудудига "қизил иблислар" яқинроқ, улар "Челси"дан 3 очко орқада. "Тоттенхэм"ни эса бу жойдан 7 очко ажратиб турибди.

Танаффусгача МЮнинг формаси "шпорлар"никидан яхшироқ эди, бироқ кутилмаган тўхталиш жамоалар имкониятини тенглаштирди. Моуринью жамоасига кичик танаффус керак эди, лондонликлар АПЛнинг кетма-кет учта ўйинида ғалаба қозона олмади, "Лейпциг"га мағлуб бўлиб, ЧЛни тарк этди.

"Манкунианлар" эса аксинча, сўнгги 5та баҳсда 3та ғалабага эришиб, 2та дуранг қайд этди. Ўша ўйинларнинг иккитасида "Манчестер Сити" ва "Челси" таслим этилди.

Сўнгги натижаларга қараб, тўхталиш "Тоттенхэм"га кўпроқ фойдали бўлди дейиш мумкин, аммо МЮда ҳам ўзига хос плюслар бор.

"Тоттенхэм"

Чемпионат тўхтатилишидан аввал Моуриньо жамоасининг бир қатор футболчилари бирин-кетин жароҳат олиб, сафдан чиқишаётганди. Португалиялик эса бу мавсум кучли тўртликка кира олмаслиги ҳақида журналистларга интервью берди.

Карантин Лондон клубининг жонига оро кирди. Айни дамда Харри Кейн, Стивен Бергвейн ва Мусса Сиссоколар жароҳатидан қутилишди.

Кореялик Сон Хён Мин май бошида армияга бориб келишга улгурди. Португалиялик мутахассис ўзининг асосий қарталарини яна қўлига олди ва бу сафар бор имкониятини ишга солиши керак. Аммо жамоада бир йўқотиш бор. Коронавирус ва осиёликлар устидан кулган Деле Алли битта ўйинга четлатилган.

"Манчестер Юнайтед"

Оле-Гуннар Сульшер май ойи охиридаги матбуот анжуманида Поль Погба ва Маркус Рэшфордлар жароҳатидан қутилганини мамнуният билан гапирди.

Жорий мавсумни Погба учун муваффақиятсиз ўтди дейиш мумкин. Франциялик жароҳатлардан азоб чекди, мухлислар ва ОАВ уни тинимсиз танқид қилди.

Миш-мишларга кўра, Бруну Фернандеш МЮга ўтганидан кейин Поль жамоада қолишга қарор қилган. Энди Сульшерда ёқимли муаммо бор - тандемда ўйнай оладиган ярим ҳимоячиларни танлаш.

Рэшфорд учун эса мавсум барқарор ўтди дея оламиз. АПЛнинг 22та учрашувида 14та гол ва 5та голли пас - ажойиб натижа. Энди Сульшер ҳам ҳудди Моуриньюдек майдонга энг кучли таркибни тушира олади.

ТАХМИНИЙ ТАРКИБЛАР

"Тоттенхэм": Льорис, Дэвис, Алдервейрелд, Вертонген, Орье, Ндомбеле, Винкс, Сиссоко, Сон, Кейн, Бергвейн.

"Манчестер Юнайтед": Де Хеа, Шоу, Линделёф, Магуайр, Ван-Бисакка, МакТоминай, Матич, Рэшфорд, Фернандеш, Жеймс, Марсьяль.

СТАТИСТИКА

АПЛ доирасида ўтказилган "Тоттенхэм" ҳамда "Манчестер Юнайтед" ўртасида ўтказилган баҳсларнинг сони 55тани ташкил қилади. Уларнинг катта қисмида (35та) МЮ ғалабага эришган. 11та баҳс дуранг билан якун топган, қолган 9та баҳсда "шпорлар"нинг қўли баланд келган.

"Тоттенхэм" - МЮ ўртасида ўтказилган сўнгги 5та баҳснинг 2тасида Лондон клуби зафар қучган экан, қолганларида "қизил иблислар" уч очкони қўлга киритган.

Тахмин

Кўплаб мухлислар ушбу ўйинда иккала жамоа гол уришини ва баҳс "Манчестер Юнайтед"нинг ғалабаси билан якунланишини тахмин қилмоқда. Бироқ Моуринью доимо сюрпризларга тўла бўлган ва бугун ҳам ўйин қизиқ ўтиши учун бор кучини ишга солади деб умид қиламиз.

Моуриньо vs Сульшер. "Тоттенхэм" vs "Манчестер Юнайтед" (превью)