11 май куни “Бунёдкор” мураббийлар штабида ўзгариш юз берган эди. Кўплар Карпенко мураббийлик курсисига энг ноқулай пайтда ўтирганини айтяпти. Дарҳақиқат, уни жуда қийин ўйинлар кутиб турибди: бугун АГМК майдонига сафар, келгуси ҳафтада “Насаф” қабул қилинади.

Лекин масаланинг 2-томонини унутмаслик керак. 44 ёшли мутахассис “Бунёдкор”ни унча-мунча мураббий орзу қиладиган шароитда қабул қилиб олди. Жамоа бу 2 ўйинни ютқазса ҳам, Карпенкога ортиқча босим бўлмайди.

Чунки АГМКни тажрибали Вадим Абрамов ва Шуҳрат Мақсудов ҳам нисбатан кучли таркиб билан 6 ўйиндан бери енга олишмаётганди (5 таси мағлубият). “Насаф”га қарши охирги тўқнашувда эса шармандали мағлубият қабул қилинган (0:5).

Бироқ, буюк мураббийлар қийин даврларда катта саҳнага чиқишини унутмаслик керак (Анчелотти, Хайнкес ёки Зидан каби). Ҳозир “Бунёдкор”даги вазият ҳам шундай. Агар АГМК ва “Насаф” мағлуб қилинса, мураббий ҳақиқий қаҳрамонга айланади. Очиғи, Карпенкода бундай қулай имконият бошқа ҳеч қачон бўлмаса керак.

Ўз навбатида “Бунёдкор”да мураббий алмашиши Миржалол Қосимов билан Рўзиқул Бердиевнинг ишини янада қийинлаштирганини ҳам айтиш керак. Чунки Карпенко бўлажак ўйинларда қайси футболчилар хизматидан фойдаланишини тахмин қилиш ҳам қийин.

Бу борада сизнинг фикрингиз қандай? У Мақсудовнинг ишини давом эттирадими ёки ўз сюрпризларини тайёрлаб қўйганми?

Муаллифнинг телеграмдаги каналига обуна бўлинг→ "Футбол анализи".

Муаммолар қаҳрамонларни пайдо қилади