Фаолиятини Қаршининг "Насаф" жамоасида бошлаган Муҳриддин Зоиров кейинчалик "Шўртан"га йўл олди. Айтишимиз мумкинки, форвард айнан Ғузорда мухлисларга танилди, ўйин амалиётига эга бўлди. Бу эса унинг фаолиятида кейинги қадамни ташлашига замин яратди. Зоиров 2025 йилни "Локомотив"да бошлайди.

- Катта футболдаги илк учрашувингиз "Насаф"да, Рўзиқул Бердиев қўл остида кечган. Дебют учрашувингиз қандай ўтган?

- Ўша вақтда имконият бергани учун Рўзиқул Бердиевдан миннатдорман. Лекин ёш бўлганим учунми ёки бошқа сабабми "Насаф" асосий таркибига қўшилиб кета олмаганман. Кейин эса "Шўртан"га ўтганман.

- Биринчи маошингиз қанча бўлган?

- "Насаф" ўринбосарлари сафида тўп тепаётган вақтимда 300 минг сўм маош олганман.

- Рўзиқул Бердиев ва Анвар Бердиевни ўхшаш томонлари борми?

- Икки мураббий ҳам тартиб-интизомга жиддий қарашади.

- "Шўртан"даги фаолиятингиз қанчалик ўсишингизга ёрдам берди?

- Ўша вақтда Ғузорга келиш ўзим учун фойдали бўлганини йиллар ўтиб англадим. Бу жамоада катта футболдаги ўрнимни топдим десам муболаға бўлмайди.

- "Локомотив"га ўтиш ҳақида тўхталиб ўтсангиз. Сизни Вадим Абрамов ҳам ўз жамоасида кўришни истаганди лекин якунда Самарқанд эмас, Тошкентга келдингиз...

- Янги мавсумга режаларим катта. Албатта Вадим Абрамовнинг қизиқиш билдиргани ёқимли. Аммо ўзим учун тўғри қарорни қабул қилдим. Фаолиятимда янги саҳифа очилмоқда. Ҳаммаси аллоҳдан. "Локомотив" жамоаси мени илиқ кутиб олди. Биринчи ўринда жамоага мослашиб олишим керак. Жамоага қўлдан келганча ёрдам беришни мақсад қилганман. "Шўртан" жамоасига, раҳбарияти, мураббийлар штаби, мухлисларга раҳмат айтаман.

Муҳриддин Зоиров — 300 минг маош, "Шўртан"даги фаолияти, Абрамов ва "Локомотив" ҳақида