- Аввало ўйингоҳга келиб жамоамизга ҳайриҳоҳлик қилган ашаддий ишқибозларимизни ғалаба билан табриклаймиз. Бугун ҳаво жуда иссиқ эди. Айниқса бу биринчи бўлимда футболчиларга муаммо туғдирди. Учрашувни бироз кечроқ бошласак ҳам бўларди. Бу масалани келишиб олдик. Клуб раҳбарияти билан маслаҳатлашиб вақтни аниқлаш кераклигини стадион ходимларига тушунтириб ўтилди. Чунки ҳар хи мухлис бор. Раҳбарият ва стадионга келган ишқибозлар учун ғалаба керак бўлади. Бу эса ўз-ўзидан келмайди. Шунинг учун биз ҳам ютиш учун тайёргарлик кўряпмиз. Стадион маъмурияти ҳам бамаслаҳат иш тутса мақсадга мувофиқ бўларди – дея гап бошлади Мурод Музаффарович.

- “Олмалиқ” етакчиларга жиддий қаршилик туғдириб, шу билан бирга ўз олдига юқори мақсадларни қўйган жамоадир. Ҳамма инфратузилмаси жойида. Мураббийлар штабидан то футболчиларигача яхши харакат қилиб келаётганди. Бундай иссиқ ҳавода ўйнашдан ташқари бизга яна ўз майдонимизда катта босим остида ўйнаш қийинчилик туғдирарди. Худога шукур, ўйлаган режаларимиз амалга ошди. Тўғри, айрим вазиятларда йигитлар хатога йўл қўйишди. Лекин шундай бўлсада, барибир уларга катта раҳмат айтмоқчиман. Қўйилган вазифани бажардик. Кўп вазиятларда бизни Яратганни ўзи сақлади. Яққол вазиятларда, дарвозабонимиз сабаб бўлди, кейин ҳимоячилар. Рақиб жамоага эса кейинги ўйинларда омад тилайман.

- Футбол жамоавий ўйин. Шунинг учун ҳам битта жамоа дейилади. Тўғри, бугун иккита голни ҳимоячиларимиз киритди. Асосийси ғалаба қозондик. Дилёр Эрматовни гол уришини олдиндан уқтирганимиз йўқ. Шунчаки у ўйиндаги вазиятдан келиб чиқиб, иш тутди. Буни сезиш қобиляти дейди. Жаримадан эса Пўлатов тўп киритди. Лекин у билан машғулотлар чоғида ишлагандик. Агарда жарима зарбалари бўлса, уни Шукурали тепишини олдиндан айтгандик.

- “Олмалиқ” кучли жамоа. Худога шукур қилишимиз керак, бугун бизга шундай голларни берди. Бугун йирик ҳисобда ютқазиб қўйишимиз ҳам мумкин эди. Тезкор голлар режамизни бароридан келтирди.

- Кейинги турда “Қўқон-1912” меҳмони бўламиз. “Олмалиқ”, “Андижон” умуман олдинги ўйинларга қандай тайёргарлик кўрган бўлсак, бўлажак баҳсга ҳам шу тарзда ҳозирлик кўрамиз. Бугуннинг ўзиданоқ “Қўқон-1912”га тайёргарликни бошлаймиз. Масалан мен кейинги ўйин ҳақида бугунданоқ бош қотираман. Футболчиларга келадиган бўлсак, 8 июнь куни Шерзод Ҳакимовни никоҳ тўйи. Шуни ўтказиб олиб, машғулотларни бошлаймиз. Биз мураббийларни иш режамиз бор. Ўша кунга қандай концпект қилган бўлсак, шу асосда машғулот ўтказиб, футболчиларга қандай юклама бериш ёки тактик услуб танлашни аниқлаймиз. Шу тариқа футболчиларни дербига тайёрлашга уринамиз.

- Бундан бир ой олдин мураббийлар штаби билан маслаҳатлашган холда бош қотирдик. Биринчи даврадан сўнг юзага келадиган танаффусда нималар қилиш кераклиги борасида ҳомаки режаларни тузиб чиққанмиз. Қайси позицияларни кучайтиришимиз лозим? Қаерда йиғин ўтказамиз? Булар ҳақида иккита вариантимиз бор. Агарда раҳбарият биринчи вариантга руҳсат берса шуни қиламиз. Акс холда иккинчи вариантдан фойдаланаверамиз. Режаларимиз қанчалик амалга ошади, буни вақт кўрсатади - дейди Исмоилов.

Исломбек Рустамбеков.

Мурод Исмоилов: “Стадион маъмурияти ўйин вақтини клуб билан маслаҳатлашган холда аниқласа яхши бўларди”