Сер Бобби Чарльтон - инглиз футболининг тимсоли!

Қариндошлари туфайли Бобби Чарльтон болалигидан футбол ўйнай бошлаган. 1953 йилнинг бошида у шарқий Нортумберленднинг ўрта мактаб жамоаси таркибида футбол ўйинида иштирок этди. Ўйиндан сўнг учрашувни кузатиб борган Англия чемпионатининг биринчи (юқори) дивизион клуби вакили "Манчестер Юнайтед" уни ушбу жамоада профессионал фаолиятини бошлашга таклиф қилди.

1954 йилнинг октябрь ойида у "Манчестер Юнайтед" билан шартнома имзолади. Бобби ҳужум зонасига жойлаштирилди. У асосий таркибдаги дебютини 1956 йилнинг 6 октябрида Лондоннинг "Чарльтон Атлетик" клубига қарши ўйинда ўтказди. Ушбу баҳсда футболчи иккита гол урди, учрашув эса "Манчестер Юнайтед"нинг 4:2 ҳисобидаги ғалабаси билан якунланди. Шу билан биргаликда 1950 йилларнинг ўрталарида ҳарбий хизматни ўтаган. Мураббий Мэтт Басби кўмагида у тоғлардаги қуруқлик қўшинларининг артиллерия ва техник қисмига тайинланган. Чарльтон жойлашган бўлинма Шрусбери (Шропшир графлиги)да, Манчестердан 90 км узоқликда жойлашганди. Дам олиш кунлари клубда тўп тепиш ҳуқуқига эга эди. 1956/1957 йилги мавсум якунларига кўра, ҳужумчи "Манчестер Юнайтед" таркибида Англия чемпиони бўлди.

Мюнхен трагедияси ва МЮнинг қайта туғилиши

Чарльтоннинг "Юнайтед"да ўтказган илк мавсумида жамоа биринчи дивизионда ғалаба қозонди ҳамда Англия кубоги финалига қадар етиб келиб, ҳал қилувчи баҳсда "Астон Вилла"га ютқазди. Бир йил ўтгач, Бобби асосий таркибнинг муҳим ўйинчисига айланди ва клуб билан Европа чемпионлар кубогининг ярим финалига чиқди. Бу Англия футболи учун улкан муваффақият эди: инглизлар илгари халқаро майдонларда унчалик яхши натижаларга эришмаганди. Бир йил ўтгач, "Манчестер Юнайтед" ушбу натижасини такрорлади, Чарльтон эса чорак финалда "Црвена Звезда"га қарши ўйинда дубль қайд этди. Бироқ "қизил иблислар"нинг ушбу ўйиндан қайтиш пайтида 23 кишининг ҳаётига зомин бўлган Мюнхен самолёти ҳалокати содир бўлган. Чарлтон мўъжизавий тарзда омон қолди: унинг ўрни самолётдан 50 метр нарига учиб кетди. Аммо Роберт бош жароҳати ва травматик шок билан қутулиб қолди. Кўпчиликдан фарқли ўлароқ, унда самолётларга нисбатан ваҳима қўзғамади. Чарльтоннинг жамоадошлари ва бош мураббийи Басби узоқ вақт ҳавога кўтарилишдан қўрқишган. Бобби эса ҳеч нарса бўлмагандек яна парвоз қилган.

Чарльтон "Юнайтед" мухлисларининг асосий умидига айланди, улар кўплаб фаворитларини, жумладан, Эдвардсни йўқотганди. "Қизил иблислар" учун мавсум якунланиши, кутилганидек, омадсиз бўлди. Заифлашган манкунианлар Англия кубоги финалида Болтонга ютқазди, Европа Чемпионлар кубоги ярим финалида эса "Милан"га имкониятни бой берди.

Мюнхен фожиасидан кейин "Манчестер Юнайтед"ни тиклаш учун Мэтт Басбига бир неча йил керак бўлди. Бу вақтда Чарльтон жамоанинг ҳужумкор ўйинида асосий бўғинга айланди. Ёш Бобби ўзини ҳар томонлама намоён қила олди. 1958 йилдан бошлаб Чарлтон Англия терма жамоасига жалб қилинган ҳамда дастлабки учрашувларданоқ рақибларини ранжита бошлаганди. Тўғри, 1958 йилги жаҳон чемпионатининг финал босқичида Бобби бирорта ўйинда ҳам майдонга тушмаган, бу эса терма жамоа мураббийлар штабига нисбатан танқидларга сабаб бўлганди. Бироқ келаси мундиалда Чарлтон терма жамоада муҳим роль ўйнайдиган ижрочига айланди. Шу билан бирга, МЮ инқироздан аста-секин чиқиб кетаётган эди. Мюнхендаги фалокатдан сўнг "қизил иблислар"нинг дастлабки соврини 1963 йилда қўлга киритилган Англия кубоги бўлди. Турнир финалида Басби шогирдлари ўша баҳсда сўзсиз фаворит ҳисобланган "Лестер"ни мағлуб этди. 1964/65 йилги мавсумда эса "Юнайтед" ниҳоят чемпионликни қўлга киритди. Бир йил ўтгач, клуб совринларсиз қолди, бироқ Чарлтон ҳаётидаги муҳим совринлардан бирини қўлга киритди.

60-йилларнинг иккинчи ярми - ЧАРЛЬТОННИНГ ОЛТИН ДАВРИ

1966 йилги жаҳон чемпионати олдидан инглиз футболида инқилоб юз берди: мамлакат терма жамоаси бош мураббийи якка ўзи якуний таркибни эълон қилиш ҳуқуқини қулга киритди. Илгари ушбу қарор ўша футболчиларни йилдан-йилга жамоага чақирган қўмита томонидан қабул қилинган. Ўша пайтдаги инглиз мураббийи Альф Рэмзи жамоани сезиларли даражада ёшартирди ва бу ўз самарасини берди. Миллий терма жамоа ўз уйидаги жаҳон чемпионлигини қўлга киритди, турнир қаҳрамонларидан бири Чарлтон йил сўнггида "Олтин тўп"ни қўлга киритди. Робертнинг Жаҳон чемпионатида энг юқори кўрсаткичга (учта гол) эга бўлгани ажабланарли эмасди, чунки у ярим ҳимояда ўйнаган ва ҳужумчилар учун асосий снаряд вазифасини ўтаган.

1966/67 йилги мавсумда Чарлтон яна Англия чемпиони бўлди, бир йилдан сўнг "Манчестер Юнайтед" билан биргаликда Европа Чемпионлар кубогини қўлга киритди. Финалда ўз мамлакатларининг ўша пайтдаги энг яхши намоёндалари яна тўқнаш келди: англиялик Чарлтон ва португалиялик Эйсебио. Ўша оқшом "қора марварид" инглизлар дарвозасини ишғол қила олмади, лекин Бобби дубль қайд этди ва "Юнайтед"нинг қўшимча вақтда 4:1 ҳисобидаги ғалабасини таъминлади. "Манчестер Юнайтед" эса асосий еврокубокни қўлга киритган биринчи инглиз клуби бўлди.

Бир неча ой ўтгач, Чарлтон яна Европа майдонида порлади. Қитъа чемпионатида британияликлар учинчи ўрин учун кечган учрашувда СССРни мағлуб этиб, бронза медалларини қўлга киритди - 2:0. Бир йил ўтгач, Чарлтон Британия империяси ордени билан тақдирланди, шунингдек, Англия терма жамоаси сардори этиб тайинланди ҳамда жамоадаги юзинчи ўйинини ўтказди. Умуман олганда, Сер Бобби терма жамоа сафида 106 учрашув ўтказиб, 49 та гол урди. 1973 йилгача бу кўрсаткич Бобби Мур томонидан забт этилгунга қадар Англия терма жамоаси тарихидаги энг яхши кўрсаткич бўлиб турганди. Шунингдек, Чарлтон 2017 йилгача Уэйн Руни ундан ўтиб кетгунга қадар "Манчестер Юнайтед" тарихидаги тўпурар ҳисобланганди. Сер Бобби "қизил иблислар" сафида 758 ўйинда 249 та гол урган. 35 йил давомида ҳеч ким "Манчестер Юнайтед" сафида энг кўп ўйин ўтказиш бўйича унинг рекордини янгилай олмади, лекин 2008 йилда Райан Гиггз буни уддалади.

Чарльтоннинг "Манчестер Юнайтед" билан сўнгги муваффақиятли мавсуми 1966/67 йил эди, ўшанда "қизил иблислар" Англия кубогини қўлга киритган. Шундан сўнг гарчи уни терма жамоага таклиф қилишда давом этишса ҳам юлдуз футболчининг карьераси аста-секин пасая бошлади. Чарльтон - тўртта жаҳон чемпионатида қатнашган ягона инглиз футболчиси.

МЮни тарк этиш ва карьера якуни

Чарльтон "Манчестер Юнайтед"ни 1973 йилда, 35 ёшида тарк этган. Сер Бобби "Престон" клуби бошыарувчисига айланди ва жамоа бошқарувига келганидан бир йил ўтиб, майдонга қайтишга қарор қилди ҳамда жамоанинг футболчи-мураббийига айланди. У "Престон" сафида жами 45 та ўйин ўтказиб, 10 та гол урди. 1975 йилда "Олтин тўп" соҳиби яна бутсаларини михга илди ва ВВСда ўйинларни шарҳлай бошлади. Аммо Чарльтонга футболчилик фаолиятини якунлаш 1980 йилда насиб этди. "Престон"дан кейин уни Ирландиянинг "Уотерфорд", Уэльснинг "Бангор", Жанубий Африканинг "Аркадия", Австралиянинг "Ньюкасл" ва "Блэктаун"га олиб келишди.

Фаолиятини якунлаганидан кўп ўтмай Чарльтон "Уиган" президентига айланди ва 1983 йилда бир муддат жамоа бош мураббийи сифатида ишлади. Бир йил ўтгач, афсонавий футболчи "Манчестер Юнайтед" директорлар кенгашига таклиф қилинди ва шу кунгача клубда фаолият юритади.

1994 йилда қиролича Елизавета II буюк футболчини рицарлик унвони билан тақдирлади. Сер Бобби Чарлтон - Англиянинг миллий ғурури. У мунтазам равишда барча халқаро футбол ишларида ўз ватани вакили сифатида иштирок этади.

У иккита жаҳон чемпионатининг рамзий жамоасига киритилган (1966 ва 1970), турли версиялар бўйича дунёнинг 100 та энг яхши футболчиси рўйхатига киритилган. Сер Бобби Чарлтон - тирик футбол афсонаси. Жозе Моуриньо 2018 йилда "Манчестер Юнайтед" бош мураббийи этиб тайинлангач, унинг Сер Бобби билан биринчи учрашувидаги сўзлари шундай эди: "Сиз мамлакатим орзуларини 1966 йилда пучга чиқардингиз. Аммо шунга қарамай, сизга ҳурматим чексиз. Сиз 45 ёшга ўхшайсиз".

Ютуқлар

Жамоавий ютуқлар

"Манчестер Юнайтед"

Англия чемпиони (3): 1956/57, 1964/65, 1966/67

Англия кубоги ғолиби: 1963

Европа чемпионлар кубоги ғолиби: 1968 йил

Англия суперкубоги соҳиби (4): 1956, 1957, 1965, 1967

Жами: 9 та соврин

Англия терма жамоаси

Жаҳон чемпиони: 1966 йил

Европа чемпионатининг бронза медали совриндори: 1968 йил

Британия уй чемпионати ғолиби (10): 1958, 1959, 1960, 1961, 1964, 1965, 1966, 1968, 1969, 1970

Жами: 12 та соврин

Шахсий ютуқлар

"Олтин тўп" соҳиби: 1966

Футбол журналистлари ассоциацияси томонидан йилнинг энг яхши футболчиси: 1966

Жаҳон чемпионатининг "Олтин тўп" соҳиби: 1966

Ярмаркалар кубоги тўпурари: 1965 йил

Футбол Лигасининг 100 та афсонаси рўйхатига киритилган: 1998 йил

Англия футбол шон-шараф залига киритилди: 2002 йил

"ФИФА 100" рўйхатидан ўрин эгаллаган: 2002 йил

BBC томонидан футбол олдидаги хизматлари учун: 2008

Футболдаги хизматлари учун УЕФА президенти мукофотининг совриндори: 2009

Жаҳон чемпионатининг рамзий жамоасига киритилган (2): 1966, 1970

World Soccer маълумотларига кўра, XX асрнинг энг буюк футболчилари рўйхатига киритилган.

Оқил Абдубарноев таржимаси

"Мюнхен фожиаси"дан омон қолган рицарь — Сэр Бобби Чарльтон