Польшанинг Барвице шаҳрида ёш дарвозабонлар учун ўтказилаётган ўқув-йиғин семинарида Денис Иванков мураббий-йўриқчи (инструктор) сифатида иштирок этмоқда. "Насаф" мураббийи Иванков билан биргаликда у ерда Англиянинг "Болтон" ва "Манчестер Сити" жамоаси дарвозабонлар мураббийи ва польшалик мураббийлар йўриқчи сифатида қатнашишмоқда.

Денис Иванков у ерда юқорида тилга олинган ҳамкасблари билан ўзларининг машғулот дастурларидан намуна кўрсатишмоқда.

Европа, Россия, Украина, Беларус ва АҚШдан ташриф буюрган юзга яқин ёш дарвозабонларни Денис Иванков ўзининг махсус машғулот дастури бўйича шуғуллантирмоқда ва дарвозабонлар мураббийларига маҳорат дарсини (мастер-класс) ўтамоқда. Ушбу ўқув-йиғини 1 ҳафта давом этади.

Польшанинг Барвице шаҳридаги "GOALKEEPER" номли дарвозабонлар мактаби европада дарвозабонларни тайёрлайдиган энг яхши академия ҳисобланади. "Насаф"да фаолият юритаётган Денис Иванковни эса ушбу академия раҳбари Сергей Шиповскийни шахсан ўзи таклиф этган.

Қайд этиш керакки, Денис Иванков аввалига "Машъал" ва 2013 йилдан бошлаб "Насаф"да фаолият юритиб келмоқда. Ушбу давр мобайниа Иванков бир қатор терма жамоага номзод киперларни тарбиялашга муваффақ бўлди.

Айни пайтда Ўзбекистон терма жамоаси ва "Пахтакор" дарвозабони саналган Элдорбек Суюнов, "Машъал"да порлаган, "Насаф"да ўйнаётган Санжар Қувватов, "Қўқон-1912" дарвозасини ажойиб тарзда қўриқлаётган Ўткир Юсупов ҳам айнан Денис Иванков кашф этиб берган иқтидорли дарвозабонлар ҳисобланади.

Шунингдек, ҳозирда Ўзбекистон ёшлар ва олимпия терма жамоаларига номзод бўлган "Насаф"нинг иқтидорли ёш посбони Умид Эргашев ҳам Денис Иванковнинг топилмаси саналади. Юқоридаги барча дарвозабонлар терма жамоа дарвозабонлари ва номзод киперлар саналишади.

"Насаф" мураббийи "Манчестер Сити"даги ҳамкасби билан Польшада бирга ишлайди ФОТО