Гап шундаки “Насаф” футболчилари олий лигада охирги марта “Олмалиқ” футболчиларини 2012 йил 3 августда, сафарда 1:0 ҳисобида мағлуб этишган эди. Шундан кейин “аждарлар” кетма-кет тўртта учрашувда Шквирин жамоаси билан дурангга эришган бўлса, биринчи даврада Олмалиқда ўтган баҳсда ўзаро ўйинлар тарихида илк бор Тошкент вилояти жамоасига имкониятни бой бериб қўйишганди – 0:2. Кечаги беллашувда “Насаф” уч йиллик танаффусдан кейин “Олмалиқ”ни доғда қолдиришга эришди.

“Насаф” ва миллий термамиз посбони Элдорбек Суюнов кетма-кет уч учрашувдан буён ўз дарвозаси дахлсизлигини сақлаб келмоқда. “Насаф” сўнгги марта 14-тур доирасида Тошкентда “Пахтакор”га қарши ўйинда ўз дарвозасидан тўп ўтказиб юборганди. Умуман “Насаф” футболчилари жорий мавсумда ўтказилган 17 та баҳснинг 9 тасида ўз дарвозалари дахлсизлигини сақлаб қолишга эришишган.

Кечаги баҳсда Азамат Алланиязов жорий мавсумда ўзининг илк голини киритган бўлса, Шохрух Гадоев мавсумдаги бешинчи тўпини рақиблари дарвозасига йўллади. Шоҳрух бунгача “Қўқон-1912”, “Қизилқум” (2 та), “Сўғдиёна” жамоалари дарвозасини ишғол этганди. Қизиғи, Гадоев жорий мавсумда киритган голларининг тўрттасини чап оёқда рақиб дарвозасига йўлланган бўлса, битта тўпни боши билан дарвоза тўрига туширган.

“Олмалиқ”қа қарши баҳсда жорий мавсумда илк марта “Насаф” футболчиларидан ҳеч бири бош ҳакам томонидан огоҳлантириш ва қизил карточка билан “сийланмади”...

“Насаф” – “Олмалиқ” учрашувига оид қизиқарли фактлар