Жамоа 31 январь куни Осиё чемпионлар лигасининг ўтиш босқичида Баҳрайннинг “Ал-Хидд” жамоасини қабул қилади. Учрашув “Бунёдкор” стадионида соат 16:00да бошланади.

Баҳрайн мамлакати жамоалари юртимиз футбол клублари билан жуда кам учрашув ўтказишган. Бу билан ушбу мамлакат футбол жамоалари бизга унчалик маълум эмас. Аниқ қилиб айтадиган бўлсак, маълумотлар кам.

Биз қуйида бўлажак рақиб ҳақида умумий маълумотларни эътиборингизга ҳавола қилаяпмиз.

Клубнинг тўлиқ номи: “Ал-Хидд” спорт ва маданият клуби (AL HIDD (BHR)
Клуб раҳбари: Ахмад Салмон Алмусаллам
Шаҳар: Мухаррақ шаҳри, Баҳрайн
Ташкил этилган йили: 1945 йил
Стадиони: Баҳрайн миллий стадиони, Ал-Рифа шаҳри, сиғими 35580 ўрин
Бош мураббийи: Исо Алҳамдани (Баҳрайн)
Мусобақа: Баҳрайн премьер-лигаси (10та жамоа)
Лақаби: “цунами”

Баҳрайн премьер-лигаси 1952 йили ташкил этилган ва куз-баҳор тизимида ўтказилади. Лигада жами 10та жамоа иштирок этади. Охирги ўринни эгаллаган жамоа 1-лигага тушиб кетади. Амалдаги мамлакат чемпиони “Ал-Хидд” клуби ҳисобланади.

“Ал-Хидд” футбол клуби 1945 йилда ташкил этилган. Ўтган 2014/15 йилги Баҳрайн премьер-лигасида ўз тарихидаги илк чемпионликни нишонлаган.

Бу йилги мавсумда 9та ўйин ўтказиб, турнир жадвалини 7-поғонасини банд этиб турибди. Бўлиб ўтган 9 учрашувнинг иккитасида ғалаба, 4 учрашувда дуранг ва уч учрашувда мағлубиятга учраган. Рақиблари дарвозасини 8 марта ишғол қилиб, ўз дарвозаларидан 10та тўп олиб чиқишган.

Айни пайтда Баҳрайнда кубок баҳслари бўлиб ўтмоқда. Рақиб декабрь ойида жами 4та учрашувда майдонга тушди. Шулардан 2таси Баҳрайн премьер лигаси учрашуви бўлса, қолган 2таси Баҳрайн кубоги учрашувларидир. Премьер лига учрашувларининг иккаласида ҳам мағлубиятга учраган “Ал-Хидд” клуби, кубок баҳсларининг бирида 4:0 ҳисобида ғалаба қозонди. 30 декабр куни бўлиб ўтган “Манама клуб” жамоаси билан бўлган учрашувда эса йирик 5:0 ҳисобида мағлуб бўлди.

“Ал-Хидд” клуби навбатдаги расмий учрашувни 5 январ куни “Нажма Манама” клуби билан ўтказади. Бу учрашув Баҳрайн Футбол Ассосацияси Кубоги доирасида бўлади.

“Ал-Хидд” жамоаси таркибида маҳаллий футболчилар билан биргаликда легионер футболчилар ҳам фаолият юритади. Давралар оралиғида рақиб таркибида ўзгаришлар юзага келиши ҳам мумкин. Лекин ҳозирча жамоа таркибида уч нафар нигериялик ва бир нафар иорданиялик легионер футболчилар бор. Булар, Эфидайо Омасуи, Уче Агба, Окарандут Орок, Муҳаммад Алдовудлардир.

“Ал-Хидд” клубининг икки ўйинчиси Баҳрайн терма жамоаси шарафини ҳам ҳимоя қилишади. Булар дарвозабон - Аббос Аҳмад, ҳужумчи – Абдулваҳоб Алмалудлардир.

Рақиб таркиби ҳақидаги тўлиқ маълумотни кейинроқ эътиборингизга ҳавола қиламиз.

"Насаф" рақиби “Ал-Хидд” ҳақида