"Навбаҳор" ёзги трансфер ойнасидан самарали фойдаланган ҳолда, ўз таркибини маҳоратли футболчилар билан тўлдиришни мақсад қилган эди. Шундай ўйинчилардан бири, маҳоратли, тезкор, ҳужумкор ярим ҳимоячи Муҳаммадали Ғиёсов жамоамиз билан бир ярим йиллик шартнома имзолади.

Мазкур футболчи 2002 йил, 30 август куни Бухорода туғилган. Муҳаммадали Ғиёсов фаолиятини 2019 йилда "Бухоро" жамоасида бошлаган. 2020 йилги мавсумда илк бор асосий таркибда дебют қилган. 2021 йилги мавсумдан Тошкентнинг "Олимпик" жамоаси шарафини ҳимоя қилган. 2023 йилнинг ёзидан "Қизилқум" жамоаси шарафини ҳимоя қилишни бошлаган. Ўша йили иккинчи давра ўйинларида "Қизилқум" таркибида 13 та ўйинда 5 та гол муаллифи бўлган. 2024 йилги мавсумда Навоий жамоаси сафида барча мусобоқаларда 25та ўйинда майдонга тушган ва 6 та гол муаллифи бўлган. 2024 йилги мавсум якунида Навоий жамоасини тарк этган ва Фарғонанинг "Нефтчи“ жамоаси билан шартнома имзолаган. Жорий йилнинг биринчи даврасида Фарғонанинг "Нефтчи" жамоаси сафида тўп сурган.

Сўнгги уч мавсум (2022-2023-2024)да жамоа сафида тўп суриб ўзининг ёрқин ўйинлари билан мухлислар ёқимтойига айланган ярим ҳимоячи Жамшид Болтабоев "Навбаҳор" билан шартнома имзолади.

Футболчи 1996 йил, 3 октябрь куни Тошкент шаҳрида туғилган. Фаолияти давомида "Пахтакор", "Сўғдиёна", "Навбаҳор", "Нефтчи" жамоалари шарафини ҳимоя қилган. Жорий йилнинг биринчи даврасида Фарғонанинг "Нефтчи" жамоаси сафида тўп суриб, давралар оралиғида қадрдон бўлган жамоасига қайтди.

"Навбаҳор" Суперлиганинг биринчи даврасини "Нефтчи"да ўтказган икки ўйинчи билан шартнома имзолади