Тушликдан кейинги машғулот шаҳардаги “Навбаҳор-Умид” футбол мактабининг сунъий майдонида бўлиб ўтди.

Соат 15:00да бошланган машғулот қарийб 1 соат давом этди. Таркибдаги жиддий ўзгаришлар йўқ. Мўйдин Мамазулумов (“Локомотив”), Акрам Баҳридинов (“Навбаҳор”), Обид Жўрабоев (“Олмалиқ”), Санжар Асқаралиев (“Андижон”), Темур Аюпов (“Бухоро”), Зокиршох Нурматов (“Нефтчи”) каби олий лига клубларидан ташриф буюрган футболчилар билан бирга қуйи лигадан ҳам кўплаб ёшлар айни дамда “лочинлар”нинг ўқув-йиғин машғулотларида ўзидан яхши таассурот қолдириш мақсадида астойдил тер тўкмоқда.

Машғулотларда бош мураббий Рашид Ғофуровга яқин ўтмишнинг моҳир ҳужумчларидан бири бўлган Шуҳрат Мирхолдиршаев яқиндан ёрдам бераётганини айтиш жоиз. Таъкидлаш лозимки, Шуҳрат Мирхолдиршаев машғулот чоғида футболчиларга нисбатан талабчанлиги билан эътиборимизни тортди. Мураббий сифатида ҳам астойдил ишлашни истаётганини пайқаш қийин эмас. Шунингдек маҳаллий мураббийлар – Мустафо Байрамов билан Шерзод Жўраев ҳам асосий таркиб машғулотларида иштирок этмоқда. Бу мураббийлар ўтган йили ёшлар жамоасида фаолият юритганди. Айни дамда эса ёшлар билан Дурбек Умаралиев машғулот ўтказаётгани маълум бўлди. Айтишларича наманганликларнинг йиғини 15 январдан Тошкентга кўчади. Пойтахтдаги йиғин чоғида эътиборга молик трансферлар амалга оширилиши кутилмоқда. Бу ҳақда бош мураббий Рашид Ғофуров сайтимизга берган интервьюсида маълум қилди. Бу ҳақда кейинроқ. Сайтимизни кузатиб боринг.

Исломбек Рустамбеков.

“Навбаҳор”нинг кечаги машғулоти ҳақида ФОТОГАЛЕРЕЯ