Турнирда олий ва ўрта таълим муассасалари, корхона ва ташкилотлардан жами 12 та жамоа бош соврин учун кураш олиб боришди.

Мусобақада Ажинияз номидаги Нукус педагогика институти жамоаси ғолибликни қўлга киритди. Бекмуратов Жамал мураббийлик қилган жамоа дастлабки босқичда Нукус тумани майдонида меҳмон бўлиб 0:0 ҳисобидаги дурангга имзо чекиб қайтган бўлса, ўз майдонидаги беллашувда йирик 5:1 ҳисобида зафар қучди.
Кейинги ўйинда НДПИ жамоаси Хўжайли тумани жамоаси билан ўйнаши керак эди. Бироқ бу ўйинда хўжайлиликлар иштирок этишмади ва оқибатда Ж.Бекмуратов шогирдларига техник ғалаба ёзилди.

Финал ўйинида НДПИ ва Бердах номидаги Қорақалпоқ давлат университети жамоалари чиқишди. Мазкур тўқнашувда институт жамоаси Наврўз Алимовнинг "дубл"и эвазига 2:1 ҳисобида зафар қучиб, бош совринни қўлга киритди.

Ғолибларга диплом ва кубок топширилди. Қимматбаҳо ёки арзон совғалар ҳам берилмагани бироз аянчли ҳолат бўлди.

Мусобақа якунланганидан сўнг биз мураббий ва футболчилар фикрлари билан танишдик.

- Турнирда ўтказилган 3 та ўйинда ҳам жамоамиз устунликка эришди ва ҳақли тарзда ғолибликни қўлга киритдик. Жамоамиз сафида "Орол"даги ўйинлари орқали мухлисларга таниш бўлган Наврўз Алимов, Мирас Карлибоев, Азамат Илясов каби футболчилар асосий ролни ижро этишди. Энди жамоамиз иккинчи лига жамоалари орасида бўлиб ўтадиган Республика босқичида иштирок этишади, - дейди НДПИ жамоаси устози Ж.Бекмуратов.

- Учрашувлар анча муросасиз тарзда кечди. Айниқса финал қийин бўлди. Университет жамоасида ҳам анча кучли футболчилар бор эди. Бироқ якунда омад бизга кулиб боқди. Жамоанинг муваффақиятларида мураббийларнинг ҳиссаси юқори бўлди. Финалда гол уришни жуда хоҳлагандим. Бироқ гол ура олмаган бўлсам ҳам, жамоамнинг ғалабасидан хурсанд бўлдим. Энди Республикамизнинг бошқа вилоятлари жамоаларига қарши ўйинларга тайёргарлик кўрамиз", - дейди НДПИ жамоаси ярим ҳимоячиси Азамат Илясов.

Яқин орада Азамат Илясов билан кенг қамровли суҳбатни эътиборингизга ҳавола этамиз.

Фурқат Юсупов
Нукус шаҳридан махсус

НДПИ жамоаси Қорақалпоғистон кубогини қўлга киритди