19 июль куни Баҳром Ҳайдаров шогирдлари Қиргулида Биринчи лига вакили Наманганнинг “Норин” жамоасини қабул қилишди.

Кескин ва муросасиз курашларга бой ўтган ўйинда меҳмонлар ҳисобни биринчи бўлиб очишди. “Норин”нинг биринчи бўлимдаги тўпига Рустам Аъзамов эгалик қилди. Биринчи бўлим шу ҳисобда тугади. Иккинчи таймда майдон эгаларида ҳам ҳисобни тенглаштириш учун бир қатор қулай имкониятлар юзага келди ва мана шундай вазиятлардан бирида Иброҳим Нўъмонов вазиятни тенглаштирди. Майдон марказида тўпни рақибидан олиб қўйган Иброҳим катта тезликда олдинга ўтди ҳамда барча рақибларини ортда қолдирган ҳолда дарвоза томон зарба йўллади. 1:1.

Афсуски, тайм охирига келиб яна ўша Рустам Аъзамов ўз голи билан “Нефтчи” ёшларини жазолади ва дубл қайд этди. Шу тариқа норинликлар Қиргулидаги баҳсда зафар қучишди. 1:2

Ёшларимиз “Норин” жамоасига қарши қуйидаги таркибда ҳаракат қилишди:

Асосий таркиб: Шуҳрат Раҳмонов, Абдуқодир Ортиқов, Миржамол Неъматов, Аъзам Холматов, Иброҳим Нўъмонов, Ҳусан Ғаниев, Аброр Исмоилов, Мўминжон Маъруфжонов, Хуршид Асқаралиев, Рўстам Тўхтасинов, Анвар Абдулҳақов

Заҳирадан майдонга тушганлар: Отабек Муҳаммаджонов, Санжар Зокиров, Жавоҳир Мухторов, Сарвар Абдуллаев, Асадбек Маъмуров

Эслатиб ўтамиз, бундан аввалги назорат баҳсида Баҳром Ҳайдаров жамоаси Қувасойнинг “Цементчи” клубини кичик ҳисобда мағлубиятга учратганди. Энди “Нефтчи” ўринбосарларини Арсивнинг “Беҳисор” жамоасига қарши ўйин кутиб турибди.

“Нефтчи” матбуот хизмати

"Нефтчи" ёшлари "Норин"га ютқазди