Академия раҳбарияти томонидан амалга оширилаётган кенг кўламли ислоҳотлар аксарият мутахассислар диққат марказида турибди. Жумладан ёшлар футболини ривожлантириш халқаро қўмитаси эксперти Мишель Моммертц клуб академиясига ташриф буюрди. Таниқли мутахассис “Бунёдкор” футбол Академияси директори Шавкат Саидов ва мутахассислари билан учрашди. Суҳбат давомида европалик меҳмон сўнгги йилларда ўзбек футболининг халқаро мусобақаларда эришаётган ютуқлари, Ўзбекистон (U-17) ўсмирлар терма жамоасининг Осиё чемпионлигини қўлга киритгани, академия тарбияланувчилари Абдуқодир Хусановнинг машҳур “Манчестер Сити” клуби сафига қўшилгани, Элдор Шомуродовнинг Туркия супер лигасида тўпурарлар сафида бораётганини алоҳида эътироф этди. Мишель Моммертц Нидерландия футбол академиялари методологияси, маҳаллий мураббийларнинг иш фаолияти, академия тарбияланувчиларининг катта футболга ўтиш жараёни ҳақида маълумотлар берди ва дўстона фикрлар алмашилди. Келгусида “Бунёдкор” футбол академияси ҳамда халқаро қўмита ўртасида ҳамкорлик ишлари давом эттирилиши ҳам айтиб ўтилди.

Шунингдек, нидерландиялик мутахассис яқинда икки юлдузли “Ал-Васл” футбол академиясида бўлганини, лекин “Бунёдкор”да ёш футболчиларга яратилган шароитлар у ерникидан анча яхшироқ эканлигини таъкидлади. “Бунёдкор” футбол академиясида ёш футболчиларга яратилган қулай имкониятлар ва мавжуд футбол инфротузилмаси ушбу футбол функционерида илиқ таассурот қолдирди.

Нидерландиялик мутахассис "Бунёдкор" футбол академиясига ташриф буюрди