Биз иккинчи давранинг илк тур ўйинлари бошланиши олдидан мавсум кашфиётларидан бири "Қўқон-1912" жамоаси дарвозабони Никита Рибкиндан интервью олдик.

- Никита, биринчи давра ўйинлари кутилмаган натижаларга бой бўлишини кутганмидингиз?

- Ҳа, чемпионатда «сюрпризлар»нинг кети узилмаяпти. Демак, иккинчи давра ўйинларида ҳам шундай ноодатий ҳолатларга тайёр туришимиз керак. Очиғи, мавсум бошида бунақасини ўйлаб ҳам кўрган эмасдим. «Бунёдкор» ва «Пахтакор» жамоаларига қаранг - улар биринчи давранинг ўзида авваллари бутун мавсум давомида бой берадиганларидан ҳам кўпроқ очко йўқотишди. Фақат грандлар эмас, совринли ўринларга даъвогар жамоаларда ҳам шу ҳолат. Лекин чемпионатимиз айнан шуниси билан кучли қизиқиш уйғотмоқда.

- Хўш, шахсан ўзингиз «Қўқон-1912»ни бош кашфиёт сифатида кўрсата оласизми?

- Хулоса чиқаришга ҳали эрта. Турнир жадвалига эътибор қаратсангиз, жамоалар жойлашуви жуда зич. Яъни иштирокчиларни бир ёки икки очко ажратиб турибди. Демакки, битта тур натижалари турнир жадвалини кескин ўзгартириб юбориши ҳеч гап эмас. Бордию, бирор клуб кетма-кет 2та ўйинда очко ололмасами, жадвалдаги мавқесини бой беради-қўяди.

- «Қўқон-1912»нинг муваффақиятли иштирокини аввало, қайси асос билан изоҳлайсиз?

- Такрор айтаман, айни ҳолатда қандайдир муваффақият ҳақида гапиришга эрта. Ҳозирги натижаларимизга келсак, шунчаки, мураббийлар кўрсатмаларини сифатли бажаряпмиз.

- Бош мураббийнинг асосий талаби нима - ҳужумкор футболми?

- Худди шундай. Лекин ҳар доим ҳам ҳужумкорликка таяниш тўғри келмайди. Нўъмон Ҳасанов футболчилик даврида ҳужумкор ярим ҳимоячи сифатида тўп сурган ва биздан ҳам шундай ўйнашни сўрамоқда. Лекин тактика рақибга қараб танланади, албатта. Мураббий кўрсатмаларини бехато бажараётганимиз исботи шуки, биринчи даврада фақат «Олмалиқ» дарвозасини ишғол қилолмадик. Қолган барча ўйинларда камида 1та гол урдик.

- Мавсум бошланиши олдидан жамоа олдига қўйилган вазифа ўзгармадими? Ҳарқалай, ҳозирги ҳолатда совриндорлар сафида қолиш учун яхшигина имкониятга эгасизлар...

- Ҳа, шундай. Хуллас, энг олий мақсадлар сари интилишимиз аниқ.

- Бу мақсад ОЧЛ йўлланмасини ютишми ёки...?

- Ҳар бир жамоа халқаро аренага чиқишни хоҳлайди, шу жумладан, биз ҳам.

- Фаолиятингизнинг каттагина қисми «Пахтакор»да ўтди ва бу клуб юрагингизга анча яқин бўлса керак. Қачонлардир «уй»га қайтиш режангиз борми?

- Охирги ойларда «Пахтакор» катта ислоҳотларни амалга оширди. Аниқроғи, клубда деярли ҳамма нарса ўзгарди. «Қўқон-1912» эса фаолиятимдаги учинчи клуб ҳисобланади ва қарийб бир йилдан буён унинг шарафини ҳимоя қиляпман. Очиғи, айни пайт менга «Пахтакор»дан кўра, «Қўқон-1912» яқинроқ.

Камолиддин АЛИМОВ суҳбатлашди

Манба: "Интерфутбол" газетаси

Никита Рибкин: «Ҳозир юрагимга «Қўқон-1912» яқинроқ»