Ўйинда “шерлар” дарвозасини қўриқлаган Никита Рибкин билан алоқага чиқиб, учрашув борасидаги фикрлари билан қизиқдик.

- "Терек"ка қарши ўйин ҳақида нима дея оласиз? Рақиб ниманинг эвазига ғалаба қозонди?
- Очиғини айтганда, “Терек” жуда кучли эмасди. Биринчи бўлимда ташаббус биз томонда бўлди. Иккинчи бўлимда ҳушёрликни йўқотдик, шу сабабли қисқа вақт ичида иккита гол ўтказиб юбордик. Агар 1:0 ҳисобида олдинда бораётганимизда имкониятдан фойдалана олганимизда баҳс бизнинг фойдамизга ҳал бўлиши мумкин эди.

- Жамоа таркибига янгилардан Камолиддин Тожиев, Егор Кримец ва Артём Филипосян қўшилган. Улар ҳақида нима дея оласиз?
- Аввало Камолиддин Тожиев ва Егор Кримец жамоада янги деб бўлмайди. Улар бир неча йил давомида “Пахтакор”да ўйнашган. Егор Кримец бир йил давомида Хитойда ўйнаб анча катта тажриба орттирди. У миллий терма жамоа даражасига етди. Камолиддин Тожиев жуда тажрибали футболчи, ёшларга унинг фойдаси тегади. Артём Филипосян эса яқиндагина жароҳатдан сўнг умумий гуруҳга қайтган бўлишига қарамай, кечаги ўйинда ўзидан яхши таассурот қолдирди.

- Ўз ўйинингиз борасида нима дея оласиз? Рақиб сафида қайси футболчи дарвозангиз томон кўпроқ зарба берди?
- Ўз ўйиним борасида ҳеч нима дея олмайман, бундан ҳам яхшироқ ўйнаш учун нималар устида ишлаш кераклигини биламан. “Терек”да ким кўп зарба берганини санаганим йўқ. Бундан ташқари, ҳимоячлар ҳам менга ёрдам бериб туришди ва бир қатор вазиятларда хавфни бартараф қилишди.

Никита Рибкин: “Терек” биздан кучли ўйнагани йўқ”