"Кўпчилик тушунмаслиги мумкин, нима учун VAR баъзи ўйинларда йўқ бўлиб қоляпти.

Аввало, VAR бевосита Спорт ТВга ўйинни тўғридан-тўғри узатиб берадиган кўчма станцияга уланадиган технология. У ердан сигнални олади ва қонун қоидага асосан уни ҳакамга тақдим этади.

Аслида биздаги VAR сифатсиз эмас, шунчаки МТРКнинг бугунги футбол ўйинларига чиқаётган кўчма станциясининг имконияти бу. Шунинг учун бизда четда бўлгани каби турли нуқталардан "повтор" бера олмаймиз. Мана шу кўплаб эътирозларга сабаб бўляпти. Камига МТРКнинг йил давомида тадбирлари бисёр, бу йилни олсак, Наврўз байрами, Мустақиллик, шу кунларда Самарқанддаги ШОС. Бу ерда ҳам, айнан Суперлига ўйинларида ишлайдиган КТС (ПТС) ишлайди. Шунинг учун айрим тур ўйинларида VAR ёки тўғридан-тўғри эфир йўқ.

Масалан, Россияда Матч ТВ чемпионатнинг эгаси, аммо КТСлар Матч ТВники эмас. Улар буюртма асосида трансляция қилиб берадилар. ОФК яқинда Ўзбекистонда ўтказган Осиё чемпионатига Туркия компанияларидан бирини ёллади. У ерларда рақобат жуда катта, нафақат ТВлар ўртасида, балки КТСлар ҳам рақобат қиладилар.

Бизда ҳозирча ҳеч ким, ҳеч бўлмаса 8 та камерали шахсий 2 та КТСга эга эмас. Аслида шахсий компаниянинг хизматидан фойдаланиш учун нафақат 2 та, камида 3 та КТС керак бўлади. Сабаби қайсидир кун бизда 3 та ўйин бўлади. 2 та ПТСни деб, чемпионатни 4 кунга бўлиш мантиқсиз.

3 та КТСнинг ҳар бирида 15 кишидан ходим ишласа, 45 киши дегани. Ўртача 6 млн маош дейлик, яна компанияда 10 нафар ходим. Ойига маошнинг ўзига 330.000.000 сўм. 1 йилга деярли 4 млрд пул. Бу фақат маош. 3 та КТС ишчиларини сафарга юбориш, масофасига қараб меҳмонхона Харажати бор яна.

Бу тизим ишлаши учун Спорт ТВ ёки Футбол ТВ камида 1 йилга 12-15 млрд пулга тадбиркорга буюртма бериши керак (юқоридаги компания фақат ходимлар маошини ҳисобламайди, техника, "командировка" ва ўзининг фойдаси ҳам бўлиши керак).

Лекин бизнинг реклама бозоримиздан келиб чиқса, ҳеч бир канал ҳозир бу "риск"ка қўл урмайди. Шунинг учун ҳозирги трансляцияларга кўникишга мажбурмиз", – дейди Юлдашев.

Coca Cola Суперлигаси 18-тур учрашувларида VAR ишлатилмаслиги мумкин

Нодирхўжа Юлдашев: "Ҳозирги трансляцияларга кўникишга мажбурмиз"