Ўйин ҳақида

Кўрдингиз, жамоамиз ўйинга тўлиқ тайёр эди. Ҳужумкор ўйин кўрсатдик, "Насаф" жамоаси кўпроқ қарши ҳужумда ўйнади. Иккала жамоа ҳам яхши таассурот қолдирди. Мухлисларга ташаккур айтаман, стадионни тўлдириб бизни қўллаб-қувватлашди. Голимиз ҳам мухлисларнинг голи бўлди. Тақдир экан, мақсадимиз кейинги босқичга чиқиш эди. Чемпионатда ҳам муваффақиятли иштирок этолмадик, кубокни ҳам эрта тарк этдик. Шу туфайли футболчилар, бутун жамоа номидан мухлислардан узр сўрайман.

— Иккинчи таймда "Навбаҳор"га гол керак бўлган пайтда жамоанинг асосий ўйинчиси Иван Соловёв ҳимоядан олдинга ўтишга мажбур бўлди. Бу ҳолат ҳимоядаги бўшлиқлар билан боғлиқми ёки сизнинг тактик топшириғингизми?

Йўқ, ҳимоядаги ўйинчиларимиз ўз жойида эди. Соловёв бугун ёмон ўйин кўрсатмади. "Насаф" чап қанотимиз кучли эканини билган ҳолда алоҳида тайёрланган экан. Иван ҳам ҳимоядаги шерикларига ёрдамлашиш учун орқага қайтишга мажбур бўлди.

— Асосий вақтнинг охирида ҳисоб тенглашганидан кейин пенальтилар серияси ҳақида ўйлаганмидингиз?

Йўқ. Серияни кутмадим. Футбол-ку бу, бир дақиқа қолганда ҳам ҳисоб ўзгариб кетиши мумкин. Йигитлардан бўшашмасликни, биринчи навбатда гол ўтказиб юбормасликни сўрадим. Кўп йигитлар чарчаб қолишди. Азим Аҳмедовнинг мушакларида ҳам оғриқ пайдо бўлиб, алмаштиришимизни сўради, аммо заҳира имконияти қолмаган эди.

— Кейинги босқич ҳақида савол бермоқчиман. Ярим финалга қурьа ташланди. Сиз олдин фаолият юритган "Қўқон-1912" жамоаси ўз майдонида "Пахтакор"ни қабул қиладиган бўлди. Бу ўйинда ниманинг ҳисобига "Пахтакор"ни мағлуб қилиш мумкин?

Биз қўқонликлар билан ўйнадик. Барча майдон ҳақида гапиряпти, лекин майдон текис. "Пахтакор" бундай стадионда бемалол ўйнай олади. "Қўқон-1912" сўнгги пайтларда яхши ўйин кўрсатяпти. Чиройли ўйин бўлади, ҳали кимнинг ғалаба қозониши аниқ эмас.

Нўъмон Ҳасанов "Навбаҳор" мухлисларидан узр сўради