Ўйиндан кейин бухороликлар етакчиси Обид Жўрабоев фикрларига қулоқ тутдик.

“Ўйин тенгма-тенг кечди. Баҳс бошида тўпни кўпроқ эгаллаб туришга интилдик. Бу бизга фойда келтирди. Лекин айнан менинг хатоим билан дарвозамизга пенальти белгиланди. Рақиб эса бундан унумли фойдаланиб кетди. Биз ҳисобда ортда қолаётган бўлсакда, мувозанатни тиклашга уриндик. “Металлург” ҳам яхши ўйнади. Таркибида иқтидорли ёшлар кўпчиликни ташкил қилади. Ўйлашимча, натижа ўйинга мос бўлди.

Ҳозирда кейинги босқичга йўлланма олиш имкониятимиз бор. Айни вақтда “Сурхон” ва “Бунёдкор”да 3 очкодан бор. Ҳали кейинги босқичга чиқиш учун имкониятимиз сақланиб қолган. Бунинг учун “Бунёдкор” билан кечадиган Тошкентдаги баҳсда муваффақият қозонишимиз талаб этилади. Агарда буни бажара олсак, имконият бўлади.

Юқорида айтганимдек, пенальтига сабабчи бўлиб қолдим. Шундан кейин бироз асабийлик бўлди. Негаки, мен ўйин давомида бехато ўйнашга эътибор қаратаман. Асабийликни тезроқ унутиб, олдинга интилдим. Жарима зарбасини амалга оширишни жуда истадим. Жамоадошларимдан буни мен ижро этишни сўрадим. Гол бўлган вазиятда тўп рақиб футболчисига тегиб, йўналишини ўзгартирган бўлсада, гол бўлиб, айбимни бироз ювганимдан хурсанд бўлдим.

Обид Жўрабоев: “Гол уриб, айбимни бироз ювганимдан хурсандман”