Аммо қарор туфайли эндиликда "Обод" олий лигада иштирок этмайди ва айтиш мумкинки, жамоа тарқатиб юборилади. Қарордан ва ПФЛнинг бу борадаги позициясидан хабаримиз бор, хўш, четлатиш клубдагиларга қандай таъсир қилди? Биз шу каби саволларга жавоб топиш мақсадида жамоа бош мураббийи Андрей Демченкодан интервью олдик.

"Жар" стадионида "Пахтакор" ўринбосарларига қарши ўртоқлик учрашуви "Обод" учун охирги ўйин бўлиб қолди. Жамоа бу беллашувда 2:5 ҳисобида мағлуб бўлди. Албатта, ҳисобнинг бундай кўриниш олишига клубнинг четлатилгани ҳам сабаб бўлган бўлиши мумкин. Негаки йигитларда иштиёқ кўринмади. Ўйиндан сўнг Демченконинг фикрлари билан қизиқдик.

- Андрей Анатольевич, "Обод"нинг "Пахтакор" ўринбосарларига қарши ўртоқлик учрашуви жамоа учун охирги ўйин бўлди шундайми?
- Шундай деса ҳам бўлади. Биз бу ўйинни олдиндан режалаштириб қўйгандик. Шу боис ўтказмасликдан бирор мантиқ йўқ эди. Тўғри, федерация бизни олий лигадан четлатди, бироқ шунга қарамай бу ўйинда иштирок этишни лозим топдик.

- Футболчилар бу учрашувга қандай муносабатда бўлишди? Кимдир балки ўйнамасмиз, барибир фойдаси йўқ демадими?
- Ким футболни яхши кўрса, бошқа ўйинларда бўлганидек мазкур баҳсга ҳам одатий муносабатда бўлди. Тўғри, ютқаздик, аммо майдонга тушган ўйинчиларга эътирозим йўқ. Жамоа четлатилгани билан ҳаммаси тугагани йўқ, футболчилар ҳаракат қилишда давом этаверишса келаси йил ўзларига янги жамоа топишади.

- ПФЛ расмий сайтида "Обод"нинг четлатилгани ҳақида хабар чиққач, сиз қандай вазиятга тушдингиз ва кўнглингиздан нималар кечди?
- Албатта, кайфият яхши деб бўлмайди, жамоани четлаштириш бир ондаёқ рўй берди. Билишимча, бизни учта сабабга кўра четлатишди. Биринчиси, бадал пули тўлиқ тўланмагани, иккинчиси, клубнинг молиявий ҳолати ва лицензиялаш бўйича керакли ҳужжатлар вақтида топширилмагани ҳамда учинчиси, жамоа иккита шубҳали ўйинда иштирок этган деб топилди. Ўйлайманки, бизни келишилган ўйинда иштирок этди деб айтиш жамоага нисбатан ерга уришдек бўлди. Чунки айтишга осон, лекин исбот қани? Менимча, жамоанинг иккинчи даврада барча ўйинларни ютқазаётгани ҳамда ПФЛ учун бадал пулларининг тўлиқ тўланмагани "Обод" четлатилиши учун асосий сабаб бўлди. Мен бу билан ЎФФнинг янги раҳбарини айбламоқчи эмасман, фақат шуни айтишим мумкин, ҳозирги ЎФФ ўзини кўрсатишга ҳаракат қиляпти. Аввалига бир ҳакам четлатилди, кейин иккинчиси, мана энди клуб ҳам четлатилди. Бу эса одамларда мана федерация ишлаяпти-ку деган тасаввур уйғотади. Билишимча, бадал пуллари ПФЛ ҳисоб-рақамига ўтказиб берилганди, аммо тушмаган бўлса керак.

- "Обод"нинг четлатилиши жамоадагиларга қандай таъсир қилди?
- Бу энг аввало футболчиларга оғир ботди. Чунки улар ўз оилаларини боқиш учун шу ерда меҳнат қилишаётганди. Федрерация тўғри қарор қабул қилдими? Тўғрисини айтсам, келишилган ўйинларга шахсан ўзим қаршиман. Бу ерга бу мақсадда келмаганман. Мен шу жамоага ёрдам берай, юқори ўринларга кўтарай деган ният билан Тошкентга келгандим. Биласизми, футболда кетма-кет ютқазиш кўп учраб туради. Масалан, "Динамо" Батуми Грузия чемпионатининг иккита учрашувида бир хил 0:5 ҳисобида ютқазди. Аммо жамоага нисбатан ҳеч қандай жазо қўлланилгани йўқ. Бундан ташқари, Беларусь чемпионатида БАТЭ "Слуцк" устидан 6:0 ҳисобида ғалаба қозонди. Германияда эса "Боруссия Дортмунд" "Боруссия М"ни 6:1 ҳисобида мағлуб этди. Кўряпсизми, футболда бундай натижалар учраб туради. Хўп, қандайдир ташкилот бизнинг иккита ўйинимизни шубҳали деб хат юборди ҳам дейлик, аммо шуни унутмайлик, биз иккинчи давра бошланишига 10 кун қолганда йиғилиб, асосан ишсиз юрган футболчиларни таклиф этдик. Ниманидир ўзгартиришга ҳаракат қилдик, аммо бирин-кетин ютқаза бошладик. Ўзи жамоамиз шундоқ ҳам кучсиз бўлса, нимага энди келишилган ўйин қилишимиз керак? Бизга ҳеч нарсани исбот қилмай шунчаки четлатиб қўя қолишди. Натижада бундан кўпроқ футболчилар азият чекадиган бўлишди.

- Жамоанинг иккита ўйини шубҳа остига олингани барибир оғир ботади. Бунинг устига бу нарса ташкилот расмий сайтида эълон қилинса.
- Менгача етиб келган маълумотларга қараганда, Ўзбекистон чемпионатида келишилган ўйинлар тез-тез рўй бериб туради. Лекин айнан "Обод"нинг четлатилганига келсак, биз бошқалар олдида киммиз? Кучсиз, пули йўқ жамоамиз холос. Одатда биринчи бўлиб кучсизлар калтак ейди деган гап бежизга айтилмаган. Биз ҳам шундай ҳолатга тушиб қолдик. Агар шу ишни кўтариб юридик ташкилотларга мурожаат қилсак, ютиб чиқишимизга ишонаман. Аммо клуб раҳбари бу билан шуғулланишни истамаяпти.

- Сиз ТТЙМИ стадионида кечган "Насаф" ва "Сўғдиёна"га қарши баҳслар "тоза" ўтган дея оласизми?
- Бировни айблашдан олдин хатосини кўрсатиб исботлаш керак бўлади. Жамоамиздаги ўйинчилар савияси унчалик юқори эмас. Шу боис ҳам ғалаба қозониш қийин бўлди. Биринчи даврада жамоа "Локомотив"га 0:7 ҳисобида мағлуб бўлганди, бу ҳам жамоанинг бугунги кучини кўрсатиб турибди. Эътибор беринг, федерация айнан кимнидир айбдор демаяпти, шунчаки бутун жамоани жазолаяпти.

- Клуб ушбу қарор юзасидан протест ёзиши мумкинми?
- Мумкин, лекин энди бундан кимга фойда? Протест ёзгандан кейин юрист олиш керак бўлади, қоғоз ишлари, югур-югур, бу билан ҳеч кимнинг шуғуллангиси келмаяпти. Қолаверса, бизда жамоани ҳимоя қиладиган ташкилотларга берадиган пул йўқ. Шу боис ҳамма қарорни борича қабул қилди.

- Эндиликда режаларингиз қандай?
- Йигитлар билан хайрлашаман, ҳаммага раҳмат айтиб Украинага қайтаман. Агар ишсиз қолган футболчилар тез орада ўзларига янги топишса бундан жуда хурсанд бўлардим.

- Айтайлик, сизга яна Ўзбекистонда ишлаш таклифи тушса қандай йўл тутасиз?
- Менга Тошкент жуда ёқди ва кейинчалик бирорта жамоадан таклиф тушса жон деб кўриб чиқишга тайёрман. Ўзбекистонда футбол ташкилий томондан яхши йўлга қўйилган ва бу ерга келиб ишлаган мураббий қийналмайди.

"Обод" бош мураббийи жамоанинг олий лигадан четлатилганига изоҳ берди