Жанубий Корея, БАА ва Саудия Арабистонида ўзига хос дербилар кузатилса, Хитойда “Гуангжу Эвергранд” Япониянинг “Серезо Оска” клубини қабул қилади. Баҳслар якунига етгач, сайтимиз орқали чорак финалга кимлар чиққани ҳақида маълумот берамиз.

15:30. “Поханг Стилерс” – “Чонбук Хюндай”
Жанубий Корея дербисининг иккинчи қисми. Биринчи қисмда “Поханг Стилерс” 2:1 ҳисобида ютиб кетган. Шундай экан, жавоб учрашувидан олдин шу жамоанинг имконияти юқори баҳоланмоқда. Ҳар ҳолда уйда деворлар ҳам ёрдам беради.

17:00. “Гуангжу Эвергранд” – “Серезо Осака”
Биринчи ўйинда “Гуангжу” сафардан йирик 5:1 ҳисобидаги ғалаба билан қайтганди. Фақат мўъжизагина “Серезо Осака”ни кейинги босқичга етаклай олади. Бугунги баҳсда “Серезо” футболчиси Диего Форлан майдонга туша олмайди.

21:00. “Ал Айн” – “Ал Жазира”
БААнинг иккита клуби шу босқичда тўқнаш келди. Бугунги ўйиндан кейин кимдир мусобани тарк этади. Бу “Ал Айн” бўладими ёки “Ал Жазира”ми, буни энди вақт кўрсатади. Дастлабки баҳсда “Ал Айн” сафардан 2:1 ҳисобидаги ғалаба билан қайтганди.

22:45. “Ал Шабаб” – “Ал Иттиҳод”
Бу эса Саудия Арабистони дербиси. Жидда шаҳрида бўлиб ўтган биринчи учрашувда “Ал Иттиҳод” 1:0 ҳисобида ғалаба қозонган. Ҳозирча кичик устунлик “сариқ-қоралар” томонида. Аммо “Ал Шабаб” ўз уйида бор кучини намойиш этса керак.

ОЧЛ 1/8 финал. Бугун жавоб учрашувлари старт олади