"D" гуруҳида биринчи ўринда кетаётган "Пахтакор" Доҳадаги "Жассим бин Ҳамад" стадионида "Ал Садд" меҳмони бўлади. Ўйин Тошкент вақти билан 21:00да бошланади. Қуйида мазкур учрашувга оид баъзи маълумотларни келтириб ўтамиз.

- Тошкентда ўтказилган мазкур жамоаларнинг биринчи тўқнашуви 2:2 ҳисобида якун топди. Бу эса "Ал Садд" учун охирги 6та ўйиндаги учинчи дуранг бўлди.

- 2018 йилги ОЧЛ ярим финалчиси "Ал Садд" охирги бешта ўйинидан биттасида ғалабага эришди ва икки мартадан дуранг ва мағлубият қайд этди.

- "Ал Садд" ҳужумчиси Багдад Бунеджа ўтган йилги ОЧЛ энг яхши тўпурари ҳисобланади.

- "Ал Садд" охирги марта ўз майдонида 2011 йил "Пахтакор"га қарши баҳс олиб борган. Ўшанда жамоа 2:1 ҳисобида ғалаба қозонган, Ли Жунг Су ва Али Афиф томонидан киритилган голлар жамоага фойда келтирганди. "Пахтакор" сафида эса Темурхўжа Абдухолиқов гол муаллифи бўлган.

- Бугунги учрашувни Педро Коррейра ва Акрам Афиф дисквалификацяи сабаб ўтказиб юборади.

- Қатарда миллий чемпионат ўз якунига етди ва "Ал Садд" чемпионликни қўлга киритди. Жамоа охирги ўйинида "Умм Салал"ни 6:1 ҳисобида мағлуб этди.

- "Ал Садд" ички чемпионатда 22та ўйин ўтказиб 100та гол урди.

- "Пахтакор" Қатар клубларига қарши охирги 8та ўйинидан фақат иккитасида ғалабага эришган. Жамоа охирги марта 2012 йил "Ал Араби"ни 1:0 ҳисобида мағлубиятга учратган.

- "Пахтакор" шу пайтгача ОЧЛ сафар ўйинларида 46 бор майдонга тушиб, шундан 13тасида ғалабага эришган. 9 марта дуранг ўйнаган бўлса, 24та беллашувда имкониятни бой берган.

- Аввалги ўйинни сариқ карточкалар туфайли ўтказиб юборган Егор Кримец бугун майдонга туша олади.

- "Пахтакор" Ўзбекистон Суперлигасида ўтган турни ўз майдонида "Динамо"га қарши ўтказиб 2:0 ҳисобида зафар қучди. Бу ўйинда Жавоҳир Сидиқов билан Жалолиддин Машарипов "шерлар" сафида гол муаллифи бўлишди.

ОЧЛ. "Ал Садд" - "Пахтакор" ўйинига оид маълумотлар