Қизиғи шундаки, номзодлар орасида Беларусь чемпионатида тўп тепаётган ҳамюртимиз Жасур Яхшибоев йўқ. Шу ўринда энг яхши бўлишга номзодларни келтириб ўтсак: Абдувоҳид Неъматов ("Насаф"), Элдор Шомуродов ("Женоа"), Игорь Сергеев ("Пахтакор"), Жалолиддин Машарипов ("Пахтакор") ва Ойбек Бозоров ("Насаф").

Албатта, бизнинг рўйхатда номи келтирилган фтуболчиларга эътирозимиз йўқ, чунки улар ҳам бу мавсум кўп меҳнат қилишди. Бироқ Жасур Яхшибоев ҳам рўйхатдан жой олишга ҳақли эди.

Нима учун? Биринчидан, Яхшибоев йил бошида "Энергетик-БГУ" сафига йўл олиб, бир давра ушбу жамоада ҳаракат қилди ва биринчи давранинг энг яхши тўпурари бўлди. Ўшандаёқ у ҳақда беларуслик журналистлар Жасур - ҳақиқий топилма, у - кашфиёт деб ёза бошлашди.

Иккинчи даврада ўз жамоасини алмаштириб, Солигорскнинг "Шахтёр" клубига ўтган Яхшибоев якунда мамлакат чемпионлигини қўлга киритди. Шунингдек, тўпурарлар пойгасида 16та гол билан иккинчи бўлди.

Бизнингча, унинг УЕФАга аъзо мамлакатда чемпион бўлгани ҳамда тўпурарлар пойгасида иккинчи ўринни эгаллаганиёқ Ўзбекистонда энг яхшилардан бири бўлишга асос бўла олади. Қолаверса йил якунида Беларусь футбол федерацияси томонидан айнан Жасур Яхшибоев энг фойдали футболчи деб топилди.

Бу ўринда яна бир масала бор. Эсингиздами, карантин жуда авжига чиққан бир пайтда ҳеч қаерда футбол ўйналмаётганди. Лекин биргина Беларусда чемпионат давом этди ва ҳаммамиз фақат Яхшибоевни кузатишга ўтдик. Буни ҳам ёддан чиқармаслик зарур.

Хуллас, мана шу сабаблар туфайли ҳам Яхшибоев ЎФА томонидан эътироф этилишга лойиқ эди, ҳар ҳолда у Шомуродов ва рўйхатдаги бошқалардан кам меҳнат қилгани йўқ.

ЎФА энг яхшилар қаторига нега Жасур Яхшибоевни қўшмади?