Гап "Истиқлол" ва "Персеполис" клублари ҳақида кетяпти. Ҳар икки клуб баъзи сабабларга кўра, умумий миқдорда 45 минг доллар жаримага тортилди.

Агар деталларга тўхталадиган бўлсак, "Истиқлол" бош мураббийи Фарҳод Мажиди "Ал Дуҳайл" билан баҳсдан сўнг матбуот анжуманига келмагани учун 10 минг доллар тўлайдиган бўлди. Бундан ташқари ушбу жамоа футболчиси Воуриа Гафур "Ал Шорта"га қарши баҳсдан сўнг салбий фикрларни билдиргани учун у ҳам жаримага тортилди.

ОФК тартиб интизом қўмитаси "Персеполис" клубига нисбатан 17,500 доллар жарима қўллади. Чунки ушбу клуб Гоада бўлиб ўтган ОЧЛ ўйинлари пайтида ўз расмий сайти ва видео каналида турли бўлмағур нарсаларни жойлади. Бундан ташқари, "Персеполис" қачон ўз майдонида ўйнайдиган бўлса, 1та учрашувни мухлисларсиз ўтказади.

Шунингдек, ушбу клуб футболчиси Меҳди Торабига нисбатан ҳам жарима солинди. Чунки у ўйиндан кейинги матбуот анжуманига 15 дақиқа ичида келмаган, балки анча кечикиб келган ва бошқаларни куттириб қўйган. Ҳар икки клуб жаримага тортилгач, Эрон ФФ тартиб интизом қўмитаси ҳам бу борада тегишли ишларни олиб бориши керак бўляпти.

Бу ўринда ички чемпионатга кўп нарса боғлиқ бўлиб қоляпти. Чунки Эрон чемпионатида ўйиндан кейинги матбуот анжуманларига мураббий ва футболчилар хоҳласа киради, хоҳламаса йўқ. Бу ўринда кўп нарса натижага боғлиқ. Тартиб қўмитаси эса ҳалиям бу борада жиддий қарор қабул қилгани йўқ.

Эронлик журналистлар фикрича, матбуот анжуманига кирмаслик мухлислар, ОАВ ва ўйин ташкилотчиларига нисбатан ҳурматсизлик ҳисобланади. Бундан ташқари клублар расмий сайтида исталган нарсани чиқариш ақлга тўғри келмайди. Шу боис футбол федерация бу борада жиддий чора кўриши керак.

ОФК Эроннинг икки клубини 45 минг доллар жаримага тортди