Маълумки, U-20 жаҳон чемпионати 2021 йил Индонезияда, U-17 жаҳон чемпионати эса Перуда бўлиб ўтиши белгилаб қўйилганди. Бироқ коронавирус пандемияси туфайли жаҳон футбол ташкилоти мезбонлик ҳуқуқини сақлаб қолган ҳолда ҳар икки мусобақани 2023 йилгача бекор қилишни лозим топди.

Бу дегани тез орада ОФК ҳам U-19 ва U-16 Осиё чемпионатларини қолдириши кутилмоқда. Сабаби ҳар икки мусобақа жаҳон чемпионатига йўлланма бериш учун ўтказилади ва ФИФА кичик мундиалларни бекор қилганидан сўнг ёшлар ва ўсмирлар ўртасидаги Осиё биринчилигини ўтказишга ҳожат қолмайди. Аввалроқ УЕФА ҳам U-19 Европа чемпионатини бу йил ўтмасликни лозим топганди.

Хабарингиз бор, U-19 Осиё чемпионати 2021 йилнинг март ойида Ўзбекистонда бўлиб ўтиши режалаштирилганди. Бироқ март ойига бориб барча халқаро рейслар яна йўлга қўйилишига ҳеч ким кафолат бера олмайди. Шу боис ОФК таваккал қилмасдан мусобақани 2023 йилга қолдиришни ўйламоқда. Албатта, мусобақани Ўзбекистонда ўтказиш ҳуқуқи сақланиб қолади.

Шунингдек, Баҳрайнда ўтиши керак бўлган U-17 Осиё чемпионати ҳам 2023 йилга қолдирилади. Ушбу мусобақада иштирок этиш учун Олим Шокиров бошчилигидаги ўсмирлар термамиз ҳозирлик кўраётганди. U-19 терма жамоамиз устози эса Тимур Кападзе саналади. Катта эҳтимол билан Кападзенинг кейинги мавсум яна клуб футболига қайтиши кутилмоқда.

ОФК U-19 ва U-16 Осиё чемпионатларини қолдиради