Агар кимдир мавсум бошида Муҳаммад Салaҳ Европа Чемпионлар Лигасида “Ливерпуль” билан ярим финалига етиб бора олади деганда “мерсисайд” жамоасининг ишқибозлари ҳам эҳтимол мийиғида кулиб қўйган бўларди. Аммо Салaҳ нафақат ярим финалга чиқишнинг уддасидан чиқди… Шу ерда гапни бошқа тарафга буриб турамиз.

Жаҳон футболида мана 10 йилдирки, Роналду — Месси эраси давом этиб келмоқда. Ҳа, давом этмоқда. Улар ҳали тўхташгани йўқ. Футбол бу икковлон туфайли ўзининг очилмаган қирраларини миллионлар ўйини шайдоларига тақдим қилди. Футбол мухлисларини икки қутб бўлишга сабаб бўлганлар ҳам шу “ўзга сайёраликлар”дир. Сўнгги бор Роналду ва Мессини “Олтин тўп” маросимида икки ёнда туришга мажбур қилган сўнгги ерлик Кака эди. Орадан 10 йил ўтди. Аммо ерлик бир қанча мухлислар қачон яна бир ерлик келиб, бу “қироллар”нинг ҳукмронлигига якун ясашини кутиб келди. Шу кунлар келаётганга ўхшайди. Бундай дейишга нафақат унинг натижалари, балки кўрсатаётган ўйини ҳам сабаб бўляпти.

Кимдир Неймарнинг янги давр футболи тахтига чиқишини кутаётган бир вақтда Муҳаммад Салaҳ ўз ватани терма жамоасини Жаҳон Чемпионатига олиб чиқди. АПЛга ўтиб, бир пайтлар ўша қирол Роналду қайд этган натижани бир мавсумнинг ўзида такрорлашга улгурди. Ҳали шу натижани янгилаб, унинг ўзидан бошқа одам янгилай олмайдиган қилиб қўйса ҳам ҳайрон бўлмаймиз. Месси Чемпионлар Лигасини телевизорда кўриб ўтирган вақтда “Рома” дарвозасига фантастик гол уриб ўтирибди. Камига “Олтин бутса”ни ҳам ўзиники қилмоқчи, aзамат. Бу дегани Роналду ва Месси хавотир олманг, мен Муҳаммад Салаҳ сизларнинг ўрнингиз асло билинтирмасликка ҳаракат қиламан, деганга ўхшайди. Футбол ҳеч қачон ўз юлдузларини қизғонмайди, фақат уларнинг порлаши учун қанчадир муддат белгилайди. Салаҳ ҳозир порлаяпти. Бир сўз билан айтганда унинг кетмони учяпти! Бироз ошириб юбордим-а. Ҳа, майли! Салаҳ бугун мақтовларга ярашадиган ўйин кўрсатди.

Омадингни берсин, Муҳаммад Салaҳ!