Хусусан, қарорга кўра "Ал Ҳилол" клуби ҳужумчиси Омар Хрбин уч марта журналистларга интервью беришдан бош тортгани учун жами 50 минг АҚШ доллари миқдорида жаримага тортилди. У дастлаб "Персеполис" - "Ал Ҳилол" ўйинида интервью беришдан бош тортган.

Шу боис аввалига 10 минг доллар миқдорида жаримага тортилди. Кейинчалик бу ҳолат финал баҳсларида яна икки бор такрорланди. Натижада 20 мингдан 40 минг доллар жарима солинди. Жами футболчи 50 минг доллар тўлайдиган бўлди.

Бундан ташқари, "Ал Ҳилол" клубининг бошқа футболчилари - Салим Ал Довсари билан Осама Хавсави ҳам 10 минг доллардан жаримага тортилишди. Улар ҳам интервью бермасдан кетиб қолишган. "Ал Ҳилол" клубининг ўзи эса жами 74 минг доллар тўлайдиган бўлди.

Бунга сабаб:

1. Клуб футболчиси интервью бермагани учун - 10 минг доллар. (Ярим финал)

2. "Ал Ҳилол" - "Урава Редс" ўйини пайтида мухлислар майдонга ҳар хил буюмлар отгани ҳамда футболчилар кўзига лазер туширгани учун - 15 минг доллар.

3. Ўйиндан олдинги расмий машғулот ўз вақтида бошламагани учун - 4 минг доллар. (Финал, биринчи ўйин)

4. Клуб ўз футболчиларини интервью беришга кўндирмагани учун - 20 минг доллар. (Финал, биринчи ўйин)

5. Клуб ўз футболчиларини интервью беришга кўндирмагани учун - 25 минг доллар. (Финал, жавоб ўйини)

Шунингдек, ОФК Кубогида қатнашган Тожикистоннинг "Истиқлол" клубига 16 минг доллар миқдорида жарима солинди. Бунга сабаб ўйин пайтида тожикистонлик мухлислар тўсиқлардан сакраб ўтган ҳолда майдонга тушиб кетишга ҳаракат қилишган ва прожекторлар устига чиқмоқчи бўлишган.

Омар Хрбин 50 минг доллар миқдорида жаримага тортилди