ЕЧЛдаги натижалар ҳам ёмон эмас, ҳар ҳолда, «кекса синьора» грандларга етарлича бошоғриқ бўлмоқда. Айнан шу жамоа юлдузли таркибни қай тариқа тузишига ҳеч эътибор қаратганмисиз? Бу жиҳат диққатингиз марказидан четда қолдими? Ҳеч қиси йўқ, қуйидаги фактлар орқали гап нимадалигини тушуниб олишингиз мумкин.

1. Дани Алвес

Қаердан: «Барселона» (2016)

Нархи: Эркин агент

Бразилиялик ҳимоячи - «Юве»нинг навбатдаги топилмаси. Алвес ҳаётининг 14 йилини Испанияда ўтказди, фаолиятини якунлаш арафасида эса Туриндан бошпана сотиб олди. «Барса»га ўтишидан олдин 6 мавсум давомида «Севилья» либосида тўп суриб, ўз ўйинлари билан юлдузликка даъво қилиши мумкинлигини исботлаганди.

2. Сами Хедира

Қаердан: «Реал» (Мадрид, 2015)

Нархи: Эркин агент

«Қироллик клуби»даги 5та жароҳатли мавсум - ҳар йили шифокорлар қабулига ёзилаверишдан чарчаган Хедира ла-лигани «А» серияга алмаштиришга қарор қилди. Афтидан, у адашмаган экан. 2015|2016 йиллар мавсумида тунислик немис, Поль Погба ва Клаудио Маркизиодан ташкил топган учлик Европадаги энг яхши триолардан бирига айланди.

3. Патрис Эвра

Қаердан: «Манчестер Юнайтед» (2014)

Нархи: 1,5 миллион фунт стерлинг

Патрис Эвра - сэр Алекс Фергюсон фаолиятидаги сўнгги саккиз йил мобайнида совринлар ютган ҳимоячи. Даҳо мураббий «МЮ»дан кетгач, жамоа ўз обрўсига зид ўйин кўрсата бошлади. Мойес давридаги мавсум Патрис учун «қизил иблислар» сафидаги сўнггиси бўлди ва француз Туринга кўчиб ўтди. 35 ёшни қаршилаган Эвра ўз ўйини билан мақтана олмайди, асосий таркибдан мунтазам ўрин эгаллаши қийинлашмоқда. Аммо «Кекса синьора»нинг 2та чемпионлик соврини ва иккита Италия кубогини қўлга киритишида асосий роллардан бирини ўйнади.

4. Кингсли Коман

Қаердан: «ПСЖ» (2014)

Нархи: Эркин агент

Кингсли Коман 2014 йили Патрис Эврадан кейин «Юве» билан шартнома имзолаган иккинчи французга айланди. Унда келажаги порлоқ юлдузни кўра билган Турин клуби раҳбарияти ёш футболчига дастлабки мавсумнинг 20та ўйинида иштирок этиш ҳуқуқини тақдим этди. Сўнгра Коман тажрибасини ошириш мақсадида ижара асосида «Бавария»га йўл олди. Дарвоқе, ўзининг 20 ёшида Франция, Италия ва Германия чемпионатида ғолиб чиқишга улгурди.

5. Карлос Тевес

Қаердан: «Манчестер Сити» (2013)

Нархи: 6,75 миллион фунт стерлинг

«Манчестер Сити»да ўтган ёрқин 4 йилдан сўнг Тевес кўпмиллионли шартномаларга қизиқмади. Зеро, «ПСЖ» унга мўмай даромад таклиф қилганди. Аргентиналик ҳужумчи «Юве»га ўтиш орқали футболнинг юксак санъатини намойиш этди. Унинг Турин саёҳати узоқ давом этмади, аммо Карлосга 95та ўйинда 50та гол тақдим этди. Қолаверса, Тевес Мишель Платини, Роберто Баджо ҳамда Дель Пьеро тўп сурган «10» рақамли футболкада майдонга тушди.

6. Поль Погба

Қаердан: «Манчестер Юнайтед» (2012)

Нархи: Эркин агент

«МЮ» академиясида ўтган бир неча йил, асосий жамоанинг захира ўриндиғида ўтириш бўйича таклифлар, Фергюсоннинг кетмасликка кўндиришга бўлган уринишлари... Шундан сўнг Погба «Кекса синьора» либосини кийди. Ўша пайтдаги бош мураббий Антонио Контега майдонда қандай аҳамият касб этиши мумкинлигини исботлади. Орадан 4 йил ўтгач, Европанинг энг харидоргир марказий ярим ҳимоячиларидан бирига айланди.

7. Андреа Пирло

Қаердан: «Милан» (2011)

Нархи: Эркин агент

Пирло - Италия футболининг ҳақиқий двигатели. 2011 йили «Милан» билан навбатдаги скудеттони қўлга киритган Андреа жамоани тарк этиб, «қора-оқлар» сафига қўшилди. Марказий ярим ҳимоядан жой эгаллаб, ҳужумлар ташкил этиш масъулиятини тўлалигича ўз назоратига олди. «А» сериянинг 35та ўйинида 2500тадан ортиқ узатмани амалга оширди. Албатта, «россонерилар» Маэстрони бироз эрта қўйиб юборилганини дарҳол англашди.

8. Артуро Видаль

Қаердан: «Байер» (2011)

Нархи: 9,38 миллион фунт стерлинг

Кўп жиҳатдан айнан Пирло ва Видалнинг саъй-ҳаракатлари самараси ўлароқ, «Ювентус» «А» серияда юксак чўққиларни забт этди. 2011 йили 7-ўрин билан кифояланган клуб кейинги мавсум маррага биринчи бўлиб етиб борди. Чилилик футболчи Конте тузган таркибдаги энг асосий фигуралардан бирига айланди, унинг Туриндаги энг катта ютуғи сифатида эса Чемпионлар Лигаси финалини кўрсатиш мумкин. Бир йил аввал Видаль 28 миллион фунт стерлинг эвазига «Бавария»га сотиб юборилди.

9. Андреа Барзальи

Қаердан: «Вольфсбург» (2011)

Нархи: 225 минг фунт стерлинг

«Юве»нинг ярим ҳимоя ва ҳужум чизиғида мунтазам ўзгаришлар рўй бераётган, ҳеч бўлмаганда, бир-икки мавсум барқарор ўйин намойиш этиш уддалай олинмаётган бир паллада ҳимоя дахлсиз кўриниш касб этди: Буффон, Кьеллини, Барзальи ва Бонуччидан иборат ажойиб тўртлик пайдо бўлди. Айнан Андреа улар орасига сўнгги вакил сифатида қўшилди: «Юве» 2011 йили маҳоратли ҳимоячи учун «Вольфсбург»га атиги 225 минг фунт тўлади. Ҳозирда 35 ёшни қаршилаган Барзальи ҳам клуб, ҳам терма жамоа учун беназир футболчига айланиб улгурди.

10. Жоржо Кьеллини

Қаердан: «Фиорентина» (2005)

Нархи: 5,48 миллион фунт стерлинг

Шубҳасиз, Буффон - «Кекса синьора»нинг тирик афсонаси. Фаолиятининг 11 йилини «оқ-қоралар» либосида ўтказган Кьеллини ҳам «Ювентус» тимсолларидан бири ҳисобланади. Жоржо клуби билан барча қийинчиликларни енгиб ўтди, «B» серия «сайри» ҳам шулар жумласидан. Аммо жамоаси билан яна элитага қайтишни уддалади ва сўнгги 5 йил мобайнида қаторасига скудеттони ўзиники қилди. Ҳимоядаги шериклари билан Италия термасида ҳам ўз ўрнини топди.

А.АҲМЕДОВ тайёрлади

Оқ-қора маблағ ёхуд «Юве»нинг юлдузли таркиби қанчага тушган?